రాజమౌళి తప్పేం అనలేదుగా! ఎందుకలా??

కేంద్ర ప్రభుత్వం రిపబ్లిక్ డే సందర్భంగా రీసెంట్ గా పద్మ అవార్డులు ప్రకటించిన విషయం తెలిసిందే. అందులో ఏడు పద్మ విభూషణ్, 19 పద్మ భూషణ్, 113 పద్మ అవార్డులు ఉండగా.. అందులో ఏడుగురు తెలుగు వారు ఉండడం గమనార్హం. కళల విభాగంలో టాలీవుడ్ సీనియర్ హీరో నందమూరి బాలకృష్ణకు పద్మ భూషణ్ వరించింది.

అయితే ఏడుగురు తెలుగు వారికి పురస్కారాలు దక్కడంతో సర్వత్రా ప్రశంసలు లభించాయి. అదే సమయంలో దర్శకధీరుడు రాజమౌళి కూడా సోషల్ మీడియాలో పోస్ట్ పెట్టారు. వారందరికీ కృతజ్ఞతలు తెలిపారు. ఈసారి ఏడుగురు తెలుగు వారికి పద్మ అవార్డులు రావడం సంతోషకరమంటూ ఆనందం వ్యక్తం చేశారు.

"పద్మ భూషణ్ కు సెలెక్ట్ అయిన నందమూరి బాలకృష్ణ గారికి అభినందనలు.. పద్మ పురస్కారాలు సొంతం చేసుకున్న తెలుగు వారితో పాటు ఇతర భారతీయులకు శుభాకాంక్షలు" అంటూ రాసుకొచ్చారు జక్కన్న. అయితే ఆయన పోస్ట్ పెట్టాక.. నెట్టింట కొందరు నెటిజన్లు కొత్త చర్చ స్టార్ట్ చేశారు. తెలుగు వారు అని స్పెషల్ గా ఎందుకు అన్నారు అని క్వశ్చన్ చేశారు.

మరికొందరు ఇంకొకడుగు ముందుకేసి.. అంతా ఇండియన్స్ కదా.. తెలుగు వారు అని ఎందుకు వేరు చేస్తున్నారని కామెంట్స్ పెట్టారు. నార్త్, సౌత్ భేదాలు చూపించారని ఆరోపించారు. కానీ వాటిలో ఎలాంటి నిజం లేదని చెప్పాలి. ఎందుకంటే జక్కన్న తెలుగు వాడు కాబట్టి.. జస్ట్ తెలుగు వారు అని పోస్ట్ పెట్టారు. ఆయన పోస్ట్ లో ఎలాంటి తప్పు లేదని క్లియర్ గా తెలుస్తోంది.

అదే సమయంలో రాజమౌళిపై విమర్శలు చేసిన వారికి ఆయన ఫ్యాన్స్ కౌంటర్ ఇస్తున్నారు. జక్కన్న.. నార్త్, సౌత్ తేడా చూపించలేదని అని క్లారిటీ ఇస్తున్నారు. అనవసరంగా విమర్శలు చేయొద్దని హితవు పలుకుతున్నారు. పుట్టిన గడ్డ ఎవరికైనా తల్లితో సమానమని గుర్తు చేస్తున్నారు. అందుకే జస్ట్ తెలుగు పీపుల్ అని మెన్షన్ చేయడంలో ఎలాంటి తప్పు లేదని చెబుతున్నారు.

ప్రస్తుతం రాజమౌళి.. మహేష్ బాబుతో యాక్షన్ అడ్వెంచర్ మూవీ చేస్తున్న విషయం తెలిసిందే. కొన్ని నెలల పాటు ప్రీ ప్రొడక్షన్ పనులు జరగ్గా.. రీసెంట్ గా సింహాన్ని బంధించినట్లు వీడియో పోస్ట్ చేశారు. ప్రియాంక చోప్రా హీరోయిన్ గా నటిస్తున్నట్లు సమాచారం. కీరవాణి సంగీతం అందిస్తుండగా.. కే ఎల్ నారాయణ భారీ బడ్జెట్ తో నిర్మిస్తున్నారు. అలా ఇప్పుడు రాజమౌళి తన మూవీతో బిజీగా ఉండగా.. ట్రోల్స్ పై స్పందిస్తారేమో వేచి చూడాలి.