ప్రభాస్​, షారుక్​ మధ్యలో సూపర్ స్టార్

విభిన్నమైన చిత్రాలతో, వైవిధ్యభరితమైన పాత్రలతో గొప్ప నటుడిగా పేరు తెచ్చుకున్నారు సీనియర్ హీరో మోహన్ లాల్. ప్రతీ చిత్రాన్ని డిఫరెంట్‌గా ప్రేక్షకులకు అందించే ప్రయత్నం చేయడంలో ఎప్పుడూ ముందుంటారు ఈ మలయాళ సూపర్ స్టార్​. ఇప్పటికే ఎన్నో హిట్ చిత్రాలను చేసిన ఆయన ఈ సారి పాన్ ఇండియా స్టార్ ప్రభాస్​, బాలీవుడ్ బాద్​ షా షారుక్​ ఖాన్​తో పోటీ పడేందుకు సిద్ధమయ్యారు.

వివరాళ్లోకి వెళితే.. ప్రస్తుతం మోహన్​ లాల్ దాదాపు అరడజను సినిమాల్లో నటిస్తున్నారు. వీటిలో మలైకొట్ట వాలిబన్​, నేరు కూడా ఉన్నాయి. ఈ రెండు చిత్రాలు రిలీజ్ డేట్​లను ఖరారు చేసుకున్నాయి. మలైకొట్టా వాలిబన్ వచ్చే ఏడాది జనవరి రిపబ్లిక్​ రోజు విడుదల కానుండగా.. అంతకన్నా ముందు ఈ ఏడాది డిసెంబర్​లో క్రిస్మస్​ కానుకగా నేరు చిత్రం విడుదలకు రెడీ అయింది.

తాజాగా ఈ నేరు విడుదల తేదీ ఖారారైంది. డిసెంబర్ 21న రానున్నట్లు మేకర్స్ ప్రకటించారు. అంటే సలార్ డిసెంబర్ 22న రానుండగా.. షారుక్​ డంకీ దాదాపుగా అదే సమయంలో రానుంది. దీంతో కేరళ బాక్సాఫీస్ ముందు త్రిముఖ పోరు ఉండనుంది. అక్కడ వారికి సలార్​, డంకీ డబ్బింగ్ చిత్రాలే అయినప్పటికీ వీటిపై కూడా మంచి ఆసక్తి నెలకొంది.

ఈ నేరు చిత్రాన్ని దృశ్యం ఫేమ్ జీతూ జోసెఫ్ డైరెక్ట్ చేశారు. దృశ్యం, దృశ్యం 2, 12 మ్యాన్ వంటి సూపర్ హిట్స్ తర్వాత నాలుగో కలిసి ఈ కాంబో పని చేయడంతో నేరుపై మంచి అంచనాలే ఉన్నాయి. ఆశీర్వాద్ సినిమాస్​ బ్యానర్​పై చిత్రాన్ని నిర్మించారు. చూడాలి మరి ఈ సినిమా సలార్, డంకీ లాంటి భారీ సినిమాల పోటీని తట్టుకుని ఎలాంటి రిజల్ట్​ను అందుకుంటుందో.

ఇకపోతే మోహన్​ లాల్ నటిస్తున్న 'బరోజ్: గార్డియన్ ఆఫ్ డి'గామా', 'రామ్: పార్ట్ 1' చిత్రాలు పోస్ట్ ప్రొడక్షన్ దశలో ఉండగా.. 'ఎంపురాన్', 'వృషభ' చిత్రాలు షూటింగ్ దశలో ఉన్నాయి. వృషభ ఏకకాలంలో తెలుగు, మలయాళంలో చిత్రీకరణ జరుకుంటోంది. రీసెంట్​గా రాంబాన్​ అనే సినిమాను కూడా ప్రకటించి ఫస్ట్ లుక్​ను రిలీజ్ చేశారు మోహన్ లాల్.