నాని హై వోల్టేజ్ యాక్షన్.. వేట స్టార్ట్

నేచురల్ స్టార్ నాని బ్యాక్ టూ బ్యాక్ సినిమాలు చేస్తూ ఫుల్ బిజీగా తన షెడ్యూల్స్ వేసుకుంటున్నారు. ఒక మూవీ కంప్లీట్ అయిపోయి థియేటర్స్ లోకి వచ్చే సమయానికి ఇంకో సినిమాని సెట్స్ పైకి తీసుకొని వెళ్తున్నారు. ఏడాదికి కనీసం రెండు సినిమాలు అయిన ప్రేక్షకులకి అందించాలనే టార్గెట్ తో నాని మూవీస్ చేస్తున్నట్లు కనిపిస్తోంది. ప్రస్తుతం అతనికున్న స్టార్ ఇమేజ్, చరిష్మాతో అదిరిపోయే కథలతో మూవీ చేస్తున్నారు.

ఈ ఏడాది దసరా మూవీతో బ్లాక్ బస్టర్ కొట్టిన నాని ఇప్పుడు హాయ్ నాన్న సినిమాతో ప్రేక్షకుల ముందుకి రాబోతున్నారు. డిసెంబర్ లో ఈ మూవీ థియేటర్స్ లోకి రాబోతోంది. ఇప్పుడు వివేక్ ఆత్రేయ దర్శకత్వంలో చేస్తోన్న సరిపోదా శనివారం మూవీని ఎనౌన్స్ చేయడమే కాకుండా సెట్స్ పైకి తీసుకొని వెళ్ళిపోయాడు. ఓ వైపు హాయ్ నాన్న సినిమా ప్రమోషన్స్ చేస్తూనే మరో వైపు వివేక్ ఆత్రేయ మూవీ షూటింగ్ కూడా స్టార్ట్ చేయడం విశేషమనే చెప్పాలి.

యాక్షన్ సన్నివేశాలతో మొదటి రోజు షూటింగ్ ని స్టార్ట్ చేసారని తెలుస్తోంది. ఈ సినిమాకి రామ్ లక్ష్మణ్ ఫైట్ కొరియోగ్రాఫర్స్ గా చేస్తున్నారు. సినిమా ఫస్ట్ లుక్, టైటిల్ కాన్సెప్ట్ టీజర్ తోనే యాక్షన్ బ్యాక్ డ్రాప్ లో నడిచే కథ అనే విషయాన్ని రివీల్ చేశారు. దానికి తగ్గట్లుగానే స్టార్ స్టంట్ కొరియోగ్రాఫర్స్ ని ఎంపిక చేయడం విశేషం. ఫస్ట్ డే షూటింగ్ లో హీరోయిన్ ప్రియాంక ఆరుళ్ మోహన్, ప్రతినాయకుడుగా చేస్తోన్న ఎస్.జె.సూర్య కూడా పాల్గొన్నారంట.

సినిమాలో కీలక నటీనటులు అందరి మీద మొదటి రోజు జరిగిన షూటింగ్ సన్నివేశాలు చిత్రీకరించినట్లు తెలుస్తోంది. నాని కెరియర్ లో మరో భారీ బడ్జెట్ చిత్రంతో ఈ సినిమా తెరకెక్కుతోంది. డివివి దానయ్య ఈ సినిమాని నిర్మిస్తున్నారు. నాని కూడా కెరియర్ లోనే హైయెస్ట్ రెమ్యునరేషన్ ఈ మూవీ కోసం తీసుకుంటున్నారు. అలాగే కోలీవుడ్ లో స్టార్ విలన్ గా దూసుకుపోతోన్న సూర్యని ఏరికోరి ఈ మూవీ కోసం ఎంపిక చేశారు.

వచ్చే ఏడాది వేసవి నాటికి మూవీని ప్రేక్షకుల ముందుకి తీసుకొచ్చే ప్లాన్ లో దర్శకుడు ఉన్నాడు. అందుకే గ్యాప్ లేకుండా వీలైనంత వేగంగా రెగ్యులర్ షూటింగ్స్ తో మూవీని పూర్తి చేయడానికి రెడీ అయ్యాడు. మరి డిఫరెంట్ టైటిల్ తో, డిఫరెంట్ కాన్సెప్ట్ తో వస్తోన్న ఈ సినిమా నానికి ఎలాంటి హిట్ ఇవ్వనుంది అనేది చూడాలి.