క్రేజీ జోనర్స్ లో '2' సినిమాలు.. సూపర్ స్టార్ దే కీ రోల్!

సినీ ఇండస్ట్రీలో ఎప్పటికప్పుడు కొత్త కొత్త ట్రెండ్స్ నడుస్తూ ఉంటాయన్న విషయం తెలిసిందే. కొన్నాళ్లుగా పాన్ ఇండియా చిత్రాల్లో ఇతర భాషల నటీనటులు గెస్ట్ రోల్స్ లేదా క్యామియో రోల్స్ చేస్తున్నారు. కొద్దిరోజులుగా ఆ ట్రెండ్ బాగా రిపీట్ అవుతోంది. టాలీవుడ్ తో పాటు ఇతర ఇండస్ట్రీలకు చెందిన యాక్టర్స్.. మిగతా భాషల సినిమాల్లో సందడి చేస్తున్నారు.

అదే సమయంలో కన్నడ సూపర్ స్టార్ శివరాజ్ కుమార్.. ఆ ట్రెండ్ ను బాగా ఫాలో అవుతున్నారు! ఇప్పటికే చేతి నిండా కన్నడ సినిమాలతో బిజీగా ఉన్న ఆయన.. మిగతా భాషల చిత్రాల్లో అవకాశాలు అందుకుంటున్నారు. ప్రస్తుతం ఉత్తరకాండ, 45, భైరవుడు సినిమాల్లో యాక్ట్ చేస్తున్నారు. వరుస చిత్రాలతో థియేటర్లలో సందడి చేసేందుకు సిద్ధమవుతున్నారు.

ఇప్పటికే ఆయన టాలీవుడ్ స్టార్ హీరో రామ్ చరణ్ అప్ కమింగ్ మూవీలో ఛాన్స్ అందుకున్న విషయం తెలిసిందే. ఉప్పెన ఫేమ్ బుచ్చిబాబు సనా దర్శకత్వం వహిస్తున్న RC 16 త్వరలో సెట్స్ పైకి వెళ్లనుంది. ఇప్పటికే పూజా కార్యక్రమాలు జరగ్గా.. మరికొద్ది రోజుల్లో రెగ్యులర్ షూటింగ్ మొదలుకానుంది. ఆ మూవీలో శివరాజ్ కుమార్ కీలక పాత్ర పోషిస్తున్నారు.

స్పోర్ట్స్ డ్రామాగా పాన్ ఇండియా రేంజ్‍ లో బుచ్చిబాబు తెరకెక్కిస్తున్న RC 16లో శివరాజ్.. పాత్రకు మంచి స్కోప్ ఉన్నట్లు తెలుస్తోంది. ఇప్పటికే ఆయన.. మూవీ స్క్రిప్ట్ వేరే లెవెల్ లో ఉందని ఓ ఇంటర్వ్యూలో తెలిపారు. బుచ్చిబాబు క్యారెక్టర్ ను క్రియేట్ చేస్తున్న విధానం పట్ల తాను ఆశ్చర్య పోయినట్లు చెప్పారు. దీంతో ఆయనకు సినిమాలో కీ రోల్ దక్కిందని ఫిక్స్ అవ్వొచ్చు.

ఇప్పుడు కోలీవుడ్ లో మరో ప్రాజెక్ట్ కు శివరాజ్ కుమార్ గ్రీన్ సిగ్నల్ ఇచ్చినట్లు జోరుగా ప్రచారం సాగుతోంది. స్టార్ హీరో దళపతి విజయ్ మూవీలో యాక్ట్ చేస్తున్నట్లు సమాచారం. హెచ్‌ వినోథ్‌ డైరెక్ట్ చేస్తున్న దళపతి 69 ప్రాజెక్ట్ లో శివరాజ్‌ కుమార్‌ నటించనున్నారని టాక్ వినిపిస్తోంది. కీలక పాత్రలో కనిపించనున్నారని, అధికారిక ప్రకటన రావడమే ఆలస్యమని తెలుస్తోంది.

ఇప్పటికే పాలిటిక్స్ లోకి పూర్తి స్థాయిలో ప్రవేశించిన విజయ్.. దళపతి 69తో సినిమాలకు గుడ్ బై చెప్పనున్నట్లు ఎప్పటి నుంచో వార్తలు వస్తున్నాయి. పొలిటికల్ బ్యాక్ డ్రాప్ లో వస్తున్న దళపతి 69లో శివరాజ్ కుమార్ ఎలాంటి రోల్ పోషిస్తున్నారనే విషయంపై ఇప్పుడు ఆసక్తి నెలకొంది. మరి RC 16, Thalapathy 69తో శివరాజ్ ఎలా అలరిస్తారో వేచి చూడాలి.