వైరల్‌ వీడియో : భార్యని సర్ప్రైజ్ చేసిన 'అమరన్‌'
ఒక్కసారిగా ఆర్మీ లుక్‌లో శివను చూసి ఆర్తీ షాక్‌ అయ్యారు. ఆ సమయంలో ఆమె సర్ప్రైజ్ అయిన తీరు, ఆ తర్వాత ఆమె స్పందించిన తీరు అందరి దృష్టిని ఆకర్షిస్తోంది.
కోలీవుడ్‌ స్టార్ హీరో శివ కార్తికేయన్ తాజాగా అమరన్‌ సినిమాతో ప్రేక్షకుల ముందుకు వచ్చి భారీ విజయాన్నిసొంతం చేసుకున్నాడు. పెద్దగా బ్యాక్‌గ్రౌండ్‌ లేకుండా ఇండస్ట్రీలో తన ప్రతిభతో అడుగు పెట్టిన శివ కార్తికేయన్ ఇప్పటికీ చాలా సింపుల్‌ అండ్ స్వీట్‌గా ఉంటాడు అంటూ ఆయనతో వర్క్ చేసిన వారు, ఆయన సన్నిహితులు అంటూ ఉంటారు. అమరన్‌ సినిమాతో భారీ విజయాన్ని సొంతం చేసుకుని స్టార్ హీరోల సరసన నిలిచిన శివ కార్తికేయన్ వీడియో ఒకటి సోషల్‌ మీడియాలో వైరల్‌ అవుతోంది. ఆ వీడియో లో తన భార్య ఆర్తీని తన లుక్‌తో శివ కార్తికేయన్ సర్ప్రైజ్ చేయడం అందరికి బాగా నచ్చింది, వీడియో ట్రెండ్‌ అవుతోంది.
అమరన్‌ సినిమా కోసం మేజర్‌గా శివ కార్తికేయన్ నటించిన విషయం తెల్సిందే. అమరన్‌ సినిమా లుక్‌లో ఒకసారి తన భార్య ముందు నిలబడ్డాడు. ఆ వీడియోనే ఇది. వంట గదిలో ఆర్తీ బిజీగా ఉన్న సమయంలో వెనుక నుంచి సైలెంట్‌గా శివ కార్తికేయన్ వెళ్లి నిల్చున్నాడు. ఒక్కసారిగా ఆర్మీ లుక్‌లో శివను చూసి ఆర్తీ షాక్‌ అయ్యారు. ఆ సమయంలో ఆమె సర్ప్రైజ్ అయిన తీరు, ఆ తర్వాత ఆమె స్పందించిన తీరు అందరి దృష్టిని ఆకర్షిస్తోంది. ఆమె స్టార్ హీరో భార్య అయినప్పటికీ చాలా సింపుల్‌గా ఉండటంతో పాటు ఇంట్లో పనులను తానే స్వయంగా చేసుకోవడం అందరికీ నచ్చింది.
శివ కార్తికేయన్ సింపుల్‌ అనుకున్నాం... కానీ ఇప్పుడు ఆర్తీని చూసిన తర్వాత ఆ అభిప్రాయం మారిపోయిందని పలువురు కామెంట్స్ చేస్తున్నారు. ఆర్తీ చాలా సింపుల్‌గా ఉండటంతో పాటు, ఆ సర్ప్రైజ్ అయిన విధానంకు అంతా ఫిదా అవుతున్నారు. హీరోల భార్యలు మరీ ఇంత సింపుల్‌గా ఉంటారా అంటూ నోరు వెళ్లబెడుతున్నారు. ఈ మధ్య కాలంలో ఎప్పుడూ ఆర్తీ సోషల్‌ మీడియాలో కనిపించలేదు. ఇప్పుడు అమరన్‌ హిట్‌ నేపథ్యంలో ఆమెను మీడియా ముందుకు తీసుకు వచ్చే ఉద్దేశ్యంతో శివ కార్తికేయన్ ఇలా ఆ వీడియోను షేర్‌ చేయించాడని తెలుస్తోంది.
ఏది ఏమైతేనేం అమరన్‌ లుక్‌ లో తన భర్తను చూసిన ఆర్తీ కళ్లలో సంతోషం కనిపించింది. కెమెరా ముందు నిలబడలేక సిగ్గుతో భర్త చాటుకు వెళ్లడం కూడా భలే అనిపించిందని కామెంట్స్ వస్తున్నాయి. అమరన్‌ సినిమా బాక్సాఫీస్‌ వద్ద భారీ వసూళ్లు నమోదు చేసింది. సినిమాకు సంబంధించి అన్ని ఏరియాల్లోనూ బ్రేక్‌ ఈవెన్‌ నమోదు కావడంతో ఫ్యాన్స్ తో పాటు మేకర్స్ ఆనందం వ్యక్తం చేస్తున్నారు. సాయి పల్లవి ఈ సినిమాలో శివ కార్తికేయన్ కి జోడీగా నటించిన విషయం తెల్సిందే. వీరిద్దరి కాంబోకి మంచి స్పందన దక్కింది. అందుకే సినిమా భారీ వసూళ్లు రాబట్టింది. త్వరలో ఓటీటీలో రాబోతున్న ఈ సినిమా మరోసారి మంచి విజయాన్ని సొంతం చేసుకునే అవకాశాలు ఉన్నాయి.