ట్రెండీ టాక్: రికార్డులు బ్రేక్ చేయ‌డానికి వ‌స్తున్నారు!
ముఖ్యంగా పాన్ ఇండియా స్టార్ గా ఓ వెలుగు వెలుగుతున్న ప్రభాస్ గ‌త ఏడాది స‌లార్ లాంటి భారీ చిత్రంతో అద్భుత విజ‌యాన్ని సొంతం చేసుకున్నాడు.
2023 భార‌తీయ సినిమాకి ప్ర‌ధానంగా హిందీ సినిమాకి కలిసి వ‌చ్చిన సంవత్సరం. ప‌ఠాన్, జ‌వాన్, స‌లార్ తో పాటు ప‌లు చిత్రాలు భారీ విజ‌యాల్ని న‌మోదు చేసాయి. 2024లో హిందీ చిత్ర‌సీమ‌తో పాటు తెలుగు, త‌మిళ ప‌రిశ్ర‌మల నుంచి చెప్పుకోద‌గ్గ భారీ చిత్రాలు విడుదల కానున్నాయి. ఇందులో సీక్వెల్ సినిమాలు మరింత ఉత్కంఠ‌ను పెంచుతున్నాయి. ఈ సంవత్సరం దేశభక్తి డ్రామాలు, భారీ యాక్షన్ థ్రిల్లర్‌లు, రొమాంటిక్ కామెడీలు ... ఊహాతీతం అనిపించే సైన్స్ ఫిక్షన్ సినిమాలు విడుదల కానున్నాయి.
ముఖ్యంగా పాన్ ఇండియా స్టార్ గా ఓ వెలుగు వెలుగుతున్న ప్రభాస్ గ‌త ఏడాది స‌లార్ లాంటి భారీ చిత్రంతో అద్భుత విజ‌యాన్ని సొంతం చేసుకున్నాడు. ఈ ఏడాది `కల్కి 2898 AD` పేరుతో మ‌రో సంచ‌ల‌నాన్ని సిద్ధం చేస్తున్నాడు. కల్కి మే 9న అత్యంత భారీగా విడుదల కానుంది. ఈ చిత్రంలో ప్రభాస్ పాత్ర ఏమిటో తెలుసుకోవాల‌న్న ఉత్సాహం అభిమానుల్లో ఉంది. ఈ సినిమా కోసం ఎంపిక చేసుకున్న నేప‌థ్యం, క‌థాంశం, సాంకేతిక అంశాలు ఇప్ప‌టికే భారీ బ‌జ్ కి తెర తీసాయి. భవిష్యత్తు డిస్టోపియన్ ప్రపంచం ఎలా ఉంటుందో నాగ్ అశ్విన్ తెర‌పై చూపించ‌నున్నారు. భ‌విష్య‌త్ లో వాహ‌నాలు క‌మ్యూనికేష‌న్ స‌హా ప్ర‌తిదీ ఎలా మార‌బోతున్నాయో చూపించ‌నున్నాడు.
మ్యాన్ ఆఫ్ మాసెస్ జూ. NTR ఈ సంవత్సరంలో భారీ పాన్ ఇండియా సెన్సేష‌న్ కోసం వేచి చూస్తున్నాడు. ఆర్.ఆర్.ఆర్ త‌ర్వాత అత‌డు న‌టిస్తున్న `దేవర: పార్ట్ 1` ఈ ఏడాది విడుదల కానుంది. జ‌నవరిలో విడుదలైన ఫ‌స్ట్ లుక్ పోస్ట‌ర్ సినిమాపై ఉత్కంఠ‌ను పెంచింది. ఈ సినిమా ఎప్పుడు రిలీజ‌వుతుంది? అన్న‌దానిపై స్ప‌ష్ఠ‌త లేక‌పోయినా.. ఎన్టీఆర్ అభిమానులను థ్రిల్ చేయ‌డానికి చిత్ర‌బృందం త్వ‌ర‌లోనే ఒక మంచి అప్ డేట్ తో వ‌స్తుంద‌ని కూడా భావిస్తున్నారు.
అల్లు అర్జున్ `పుష్ప: ది రైజ్` భారీ విజయం సాధించాక `పుష్ప: ది రూల్` కోసం మరింత ఎక్కువ శ్ర‌ద్ధ తీసుకుని ప‌ని చేస్తున్నాడు. పుష్ప 2 ఈ ఏడాది భారీ అంచనాల న‌డుమ విడుదల కానుంది. పుష్ప‌రాజ్ న‌ట‌నాభిన‌యం, డ్యాన్సులు, బాడీ లాంగ్వేజ్, ఫైట్స్ కి ఉత్తరాదిలో భారీ ఫాలోయింగ్ పెరిగింది. అందుకే పుష్ప 2పై భారీ అంచ‌నాలేర్ప‌డ్డాయి. ఇరుగు పొరుగు మార్కెట్ల‌లో భారీ వ‌సూళ్ల‌ను తేగ‌లిగే చిత్ర‌మిద‌ని ప్ర‌చారం ఉంది. గూగుల్ ట్రెండ్స్ లోను పుష్ప 2 అత్యంత క్రేజీ సినిమాగా రికార్డుల‌కెక్కింది.
బాలీవుడ్ లో అక్షయ్ కుమార్ బ్యాక్ టు బ్యాక్ రెండు భారీ సినిమాలతో అల‌రించ‌నున్నాడు. దేశభక్తి యాక్షన్-థ్రిల్లర్ `బడే మియాన్ చోటే మియాన్`లో టైగర్ ష్రాఫ్‌తో కలిసి అక్కీ న‌టిస్తున్నాడు. భారతదేశాన్ని విరోధి (పృథ్వీరాజ్ సుకుమారన్ పోషించాడు) నుండి రక్షించడానికి ప్రయత్నించే వీరుడిగా అత‌డు క‌నిపించ‌నున్నాడు. మరోవైపు అక్షయ్ త‌న రెండో చిత్రాన్ని కూడా రిలీజ్ కి రెడీ చేస్తున్నాడు. అక్షయ్, సంజయ్ దత్, రవీనా టాండన్ వంటి భారీ తారాగణంతో `వెల్‌కమ్ టు ది జంగిల్`తో అల‌రించ‌నున్నాడు. అజయ్ దేవగన్ న‌టించిన సింగం ఎగైన్ భారత స్వాతంత్య్ర దినోత్సవం సందర్భంగా విడుదల కానుంది. ఇది పాపులర్ కాప్ ఫ్రాంచైజీ నుంచి మూడవ సినిమా. అజయ్ దేవగన్ ఇందులో నీతిమంతుడైన పోలీసుగా న‌టిస్తున్నారు. ఈ చిత్రం యాక్షన్-ప్యాక్డ్ థ్రిల్లర్ క‌థాంశంతో రూపొందుతోంది. వ‌రుస‌గా ఈ సినిమాల‌న్నీ భారీ క్రేజ్ తో రిలీజ్ కానున్నాయి. బ‌న్ని, ప్రభాస్, ఎన్టీఆర్, అక్షయ్, అజయ్ దేవగన్.. వీళ్ల‌లో రికార్డులు తిర‌గ‌రాసే మొన‌గాడు ఎవ‌రు? అన్న‌ది వేచి చూడాలి.