మనుషులంత తెలివైనవి.. డాల్ఫిన్ల క్యూరియాసిటీ ‘క్రూ డ్రాగన్’ కథ

ఫ్లోరిడా తీరానికి సమీపంలోని నీలిరంగు సాగర జలాల్లో ఒక అద్భుత దృశ్యం ఆవిష్కృతమైంది. భారత సంతతికి చెందిన సునీతా విలియమ్స్‌తో సహా నలుగురు వ్యోమగాములను సురక్షితంగా భూమికి చేర్చిన క్రూ డ్రాగన్ వ్యోమనౌక మెల్లగా సముద్రంలో దిగింది. ఆ వ్యోమనౌకను ఒడ్డుకు తీసుకురావడానికి వేగంగా దూసుకొస్తున్న స్పీడ్‌బోట్ల సందడి మొదలైంది. ఇంతలో ఊహించని అతిథులు అక్కడికి చేరుకున్నారు. అవే ఒక డాల్ఫిన్ల గుంపు..

ఆ నీటి గుర్రాలు ఉత్సాహంగా క్రూ డ్రాగన్ చుట్టూ తిరుగుతూ గెంతుతూ సందడి చేశాయి. వాటి మెరిసే చర్మాలు సూర్యకాంతిలో తళతళలాడుతుండగా, అవి వ్యోమనౌకను పరిశీలిస్తున్నట్లుగా కనిపించాయి. స్పీడ్‌బోట్లు దగ్గరవుతుంటే వాటి ముందు దూసుకుపోతూ తమదైన శైలిలో స్వాగతం పలికాయి. ఆ దృశ్యం అక్కడున్న వారందరినీ ఆశ్చర్యానికి గురిచేసింది.

డాల్ఫిన్లు ఎప్పుడూ అంతే! అవి సంఘజీవులు, చాలా తెలివైనవి. కొత్తగా ఏదైనా కనిపిస్తే వాటికి చూడాలనే కుతూహలం ఎక్కువ. అందుకే సముద్రంలో నౌకలు వెళుతుంటే వాటిని అనుసరిస్తూ, వాటితో ఆడుకుంటూ ఉంటాయి. ఈసారి అంతరిక్షం నుంచి వచ్చిన ఒక వింత నౌకను చూడటానికి అవి ఎంతగానో ఆసక్తి చూపించాయి.

స్పీడ్‌బోట్లు వేగంగా కదులుతుండటంతో వాటి ముందుభాగంలో నీటి అలలు ఏర్పడ్డాయి. వాటిని ‘బౌ వేవ్’ అంటారు. డాల్ఫిన్లకు ఆ అలల మీద ప్రయాణించడం అంటే చాలా సరదా. అది వారికి ఒక రకమైన సర్ఫింగ్ లాంటిది. పెద్దగా కష్టపడకుండానే ఎక్కువ దూరం ప్రయాణించవచ్చు. అందుకే ఆ డాల్ఫిన్ల గుంపు ఆడుతూ పాడుతూ ఆ అలల వెంట సాగిపోయింది. వాటిలో కొన్ని డాల్ఫిన్లు అయితే ఆ ఒత్తిడి తరంగంలో తమకు అనువైన స్థానం కోసం ఒకదానితో మరొకటి పోటీ పడుతున్నట్లుగా కనిపించాయి. ముఖ్యంగా బాటిల్‌నోస్ డాల్ఫిన్లు ఇలా బౌ వేవ్‌లో ప్రయాణించడానికి చాలా ఇష్టపడతాయి.

క్రూ డ్రాగన్ ల్యాండింగ్ సమయంలో నీటిలో ఏర్పడిన అలజడి, ఆ తర్వాత స్పీడ్‌బోట్ల హడావుడి ఆ డాల్ఫిన్ల దృష్టిని ఆకర్షించి ఉండవచ్చు. వాటి వెంట సునాయాసంగా ప్రయాణించాలనే ఉద్దేశంతోనే అవి అక్కడికి వచ్చి సందడి చేసి ఉంటాయి.

ఈ డాల్ఫిన్ల ప్రవర్తన కొత్తేమీ కాదు. అనాదిగా సముద్రాల్లో వేగంగా ప్రయాణించే నౌకలను డాల్ఫిన్లు అనుసరించడం మానవులు గమనిస్తూనే ఉన్నారు. ప్రాచీన గ్రీకు నావికులు అయితే డాల్ఫిన్లను పవిత్రమైన జీవులుగా భావించేవారు. సముద్ర దేవుడైన పొసైడాన్‌కు అవి దూతలుగా వచ్చేవని, తమకు అదృష్టాన్ని కలిగిస్తాయని నమ్మేవారు. కష్టమైన సముద్ర ప్రయాణాల్లో అవి తమను కాపాడతాయని వారి విశ్వాసం.

కొందరు శాస్త్రవేత్తలు మరో కారణం కూడా చెబుతున్నారు. బోట్లు సృష్టించే అలజడి వల్ల చేపలు, ఇతర చిన్న సముద్రజీవులు భయపడి అటూఇటూ పరుగులు తీస్తాయి. అప్పుడు డాల్ఫిన్లకు వాటిని వేటాడటం సులువు అవుతుంది. అందుకే డాల్ఫిన్లు నౌకలను వెంబడిస్తుంటాయని వారు అంటారు.

కానీ ఆ రోజు ఫ్లోరిడా తీరంలో కనిపించిన డాల్ఫిన్ల ఉత్సాహం చూస్తుంటే, అవి కేవలం సరదాగా విహరించడానికి, తమ కుతూహలాన్ని తీర్చుకోవడానికే వచ్చాయని అనిపించింది. ఆ అంతరిక్ష నౌకను, దానిని తీసుకెళ్లడానికి వచ్చిన స్పీడ్‌బోట్లను చూసి అవి ఎంతగానో ఆనందించాయి.

డాల్ఫిన్లు నిజంగా ప్రత్యేకమైన జీవులు. క్షీరదాలైనప్పటికీ అవి నీటిలో జీవిస్తాయి. తమ పిల్లలకు పాలిచ్చి పెంచుతాయి. గుంపులుగా కలిసి ఉంటాయి. ఒక్కో గుంపులో కొన్ని డజన్ల డాల్ఫిన్లు ఉంటాయి. కొన్నిసార్లు వేల సంఖ్యలో కలిసిపోయి ‘సూపర్‌పాడ్‌’గా ఏర్పడతాయి. అప్పుడు అవి కలిసి వేటాడుతాయి. చేపల్లా కాకుండా డాల్ఫిన్లు నీటి అడుగున ఊపిరి పీల్చుకోలేవు. ఆక్సిజన్ కోసం అవి తరచూ నీటి ఉపరితలానికి రావాల్సి ఉంటుంది.

నిద్రపోయే సమయంలో కూడా డాల్ఫిన్లు చాలా తెలివిగా ప్రవర్తిస్తాయి. వాటి మెదడులోని ఒక భాగం విశ్రాంతి తీసుకుంటుంటే, మరో భాగం చుట్టూ ఏం జరుగుతుందో కనిపెడుతూ ఉంటుంది. ప్రమాదం వస్తే వెంటనే మేల్కొంటాయి. అంతేకాదు, డాల్ఫిన్లు ఒకదానికొకటి ప్రత్యేకమైన పేర్లతో పిలుచుకుంటాయి. ఆ పేర్లు ఈలల్లాంటి శబ్దాల రూపంలో ఉంటాయి.

ఆ రోజు క్రూ డ్రాగన్ చుట్టూ సందడి చేసిన డాల్ఫిన్ల గుంపు కూడా తమదైన శైలిలో ఆనందం వ్యక్తం చేసింది. సునీతా విలియమ్స్‌తో సహా ఆ నలుగురు వ్యోమగాములు సురక్షితంగా భూమికి చేరుకోవడం ఒక గొప్ప విషయం. ఆ క్షణాన్ని మరింత ప్రత్యేకంగా మార్చాయి ఆ డాల్ఫిన్ల సందడి. ఆ దృశ్యం ఎప్పటికీ అందరి మదిలో ఒక మధురమైన జ్ఞాపకంగా నిలిచిపోతుంది. సముద్రపు లోతులనుంచి వచ్చిన ఆ ప్రత్యేక అతిథులు తమ ఉనికితో ఆ ల్యాండింగ్‌కు ఒక అద్భుతమైన ముగింపునిచ్చారు.