గంగూలీ కుమార్తె కారును ఢీకొట్టిన బస్సు... ఛేజింగ్ చేసి మరీ పట్టుకున్న సన!

మాజీ క్రికెటర్, టీమిండియా మాజీ కెప్టెన్, బీసీసీఐ మాజీ చీఫ్ సౌరభ్ గంగూలీ కుమార్తె సనాక్ తృటిలో ప్రమాదం తప్పింది. ఓ బస్సు.. ఆమె ప్రయాణిస్తున్న కారును ఢీకొట్టింది. శుక్రవారం రాత్రి కోల్ కతా లోని డైమండ్ హార్బర్ లో ఈ ఘటన చోటు చేసుకుంది. దీంతో.. ఒక్కసారిగా ఈ విషయం తీవ్ర కలకలం రేపింది.

అవును... సౌరభ్ గంగూలీ కుమార్తె సనాకు త్రుటిలో పెను ప్రమాదం తప్పిందనే చెప్పాలి. ఇందులో భాగంగా... ఆమె ప్రయాణిస్తున్న కారును ఓ బస్సు ఢీకొట్టింది. కోల్ కతా నుంచి రాయ్ చక్ వెళ్తున్న ఆ బస్సు.. బెహలా చౌరస్తా ప్రాంతంలో సనా కారును వెనుక నుంచి ఢీకొట్టింది. ఆ సమయంలో.. కారును డ్రైవర్ నడుపుతుండగా, సనా పక్క సీట్లో కూర్చుని ఉన్నారు.

ఈ సమయంలో... వారు ప్రయాణిస్తున్న కారును వెనుక నుంచి ఢీ కొట్టిన అనంతరం బస్సు వేగంగా వెళ్లిపోయింది. దీంతో.. కారు డ్రైవర్ దాన్ని వెంబడించారు. ఈ ఛేజింగ్ లో భాగంగా కొంత దూరం వెళ్లిన తర్వాత బస్సును అడ్డగించిన గంగూలీ కుమార్తె.. పోలీసులకు సమాచారం అందించారు.

దీంతో.. సమాచారం అందుకున్న పోలీసులు హుటాహుటిన ఘటనా స్థలానికి చేరుకుని, ఆ బస్సు డ్రైవర్ ను అదుపులోకి తీసుకున్నారు. ఈ సందర్భంగా స్పందించిన పోలీసులు... ఈ ప్రమాదంలో సనా కారు స్వల్పంగా ధ్వంసమైందని.. అయితే ఈ ఘటనలో ఆమెకు ఎలాంటి గాయాలు కాలేదని పేర్కొన్నారు.