తెగే వరకూ లాగేసి సాధించేంది కేసీఆర్?

సమ్మె చేస్తున్న ఆర్టీసీ ఉద్యోగులపై చేయాల్సిన హెచ్చరికలు చేసేసిన కేసీఆర్.. తాజాగా సంస్థలో పని చేస్తున్న 48 వేల మంది ఉద్యోగుల్ని తొలగించినట్లేనని స్పష్టం చేశారు. ఈ ఒక్క స్టేట్ మెంట్ చాలు.. ఆర్టీసీ ఉద్యోగుల్లో ఆగ్రహం కట్టలు తెగటానికి. కేసీఆర్ చెప్పుకున్నట్లుగా ఆర్టీసీ మీద ప్రజల్లో వ్యతిరేకత ఉందనటానికి  నిదర్శనగా ఒక్క ఆందోళన అయినా జరిగిందా?

రోడ్ల మీదకు వచ్చి రచ్చ చేయటం వదిలేయండి.. కనీసం సోషల్ మీడియాలో ఏ ఒక్కరైనా ఆర్టీసీ కార్మికుల సమ్మెను బలుపు చర్యగా అభివర్ణిస్తూ పోస్ట్ చేస్తారు. ఇవాల్టి రోజున ఇష్యూ ఏదైనా.. తమకు సంబంధం ఉన్నా లేకున్నా.. హాట్ టాపిక్ గా ఉన్న ప్రతి అంశంపైనా సామాన్యుల నుంచి సెలబ్రిటీల వరకూ స్పందిస్తున్నారు. సమ్మె నిర్ణయంపై సామాన్యుల నుంచి ప్రముఖుల వరకూ ఎవరూ తప్పు పట్టలేదు. అదే సమయంలో.. కేసీఆర్ తీసుకున్న నిర్ణయంపైనా విమర్శలు ఇప్పటికైతే రాలేదు.

తెగే వరకూ పరిస్థితిని తీసుకురావటం ఎవరికి మంచిది కాదు. ఈ రోజున ఆర్టీసీ ఉద్యోగుల విషయంలో కఠినంగా.. కటువుగా వ్యవహరించిన కేసీఆర్ రేపొద్దున తమ విషయంలోనూ అదే తీరును ప్రదర్శిస్తే తమ సంగతేమిటన్న సందేహంతో ప్రభుత్వ ఉద్యోగులంతా సంఘటితమైతే.. ఇష్యూ మరింత పెద్దది కావటం ఖాయం. అదే జరిగితే.. ఇప్పుడున్న ఆర్థిక సమస్యల చీకాకులు.. కేంద్రం నుంచి ఎదురవుతున్న సవాళ్లకు.. సొంత ప్రజల అండ లేని పరిస్థితికి కేసీఆర్ చేరుకుంటారన్నది మర్చిపోకూడదు.

తరచూ సంపన్న రాష్ట్రమని గొప్పలు చెప్పుకునే సీఎం కేసీఆర్.. పక్కనున్న ఏపీ ముఖ్యమంత్రి ఆర్టీసీని ప్రభుత్వంలో విలీనం చేసినప్పుడు.. తెలంగాణలో ఎందుకు జరగకూడదన్న ప్రశ్న హేతుబద్దతతో కూడుకున్నదే. అప్పులకుప్పలో కూరుకుపోయిన ఏపీలాంటి చోటే.. ఆర్టీసీని ప్రభుత్వంలో విలీనం చేసినప్పుడు.. సంపన్న తెలంగాణలో అదెందుకు సాధ్యం కాదన్న ప్రశ్న సామాన్యుడిలో కలగటమే కాదు.. ఆర్టీసీ కార్మికులు చేస్తున్న సమ్మెకు మద్దతుగా నిలుస్తారని చెప్పక తప్పదు. తెగే వరకూ లాగి సాధించేది ఉండదన్న విషయాన్ని కేసీఆర్ లాంటి మేధావికి తెలీకపోవటమేమిటి.. కాల వైచిత్రి కాక.