అందుకే బన్నీ.. మహేష్ అలా ఫిక్స్ అయ్యారా?

రికార్డుల గురించి మాట్లాడుకోవాలంటే 'బాహుబలికి ముందు-తర్వాత' అని చెప్పుకోవాలి.  బాహుబలికి ముందు పరిస్థితి ఎలా ఉండేదంటే ఒక సినిమా రికార్డులను మరో సినిమా నెలలోనో.. ఏడాదిలోనో బద్దలు కొట్టేది.  మహా అయితే రెండు మూడేళ్లు.   కానీ బాహుబలి రికార్డులు ఎలా ఉన్నాయంటే అవి బద్దలు కొట్టాలని అదిపనిగా ప్రయత్నించిన తమిళ హిందీ మేకర్లు చతికిల పడ్డారు. ఇక ఇతర తెలుగు మేకర్ల సంగతి సరేసరి.   అవి ఇప్పట్లో బ్రేక్ అయ్యేలా లేవు.  దీంతో నాన్-బాహుబలి అనే కేటగిరీని తీసుకొచ్చి సెకండ్ ప్లేస్ కోసం తెగ ఫైట్ చేసుకుంటున్నారు.  ఈ సంక్రాంతికి విడుదలైన పెద్ద సినిమాలు 'సరిలేరు నీకెవ్వరు'.. 'అల వైకుంఠపురములో' పరిస్థితి కూడా సేమ్ టు సేమ్.

నిజానికి ఈ సినిమాలకు వచ్చిన ఒరిజినల్ కలెక్షన్స్ కంటే పెంచి చూపిస్తున్నారనే ఆరోపణలు జోరుగా ఉన్నాయి.  ఇక పోటాపోటీగా రెండు సినిమాల మేకర్స్ తమ సినిమా నాన్-బాహుబలి రికార్డు బ్రేక్ చేసిందని.. నాన్ - బాహుబలి 2 రికార్డు బ్రేక్ చేసిందని ప్రకటించుకుంటున్నారు.  రెండు సినిమాలకు ఒకేసారి ఈ రికార్డులు ఎలా వస్తున్నాయో తెలియక జనాలు అయోమయంలో ఉన్నారు.  ఈ రికార్డులపై సోషల్ మీడియాలో జోకులు.. సెటైర్లు పేలుతున్నాయి. నాన్ - బాహుబలి రికార్డులు జెన్యూన్ గా అయితే 'రంగస్థలం' పేరిట ఉన్నాయనేది ట్రేడ్ వర్గాల వారి మాట. అయితే ఈ విషయంలో కూడా పెద్దగా ఏకాభిప్రాయం.. క్లారిటీ లేదు.  కొందరేమో ఆ కలెక్షన్స్ ను 'సాహో' దాటేసింది అంటారు. కొందరేమో 'సైరా' దాటేసింది అని కూడా అంటున్నారు.  అయితే 'సాహో'.. 'సైరా' సినిమాల రియల్ కలెక్షన్స్ బ్రహ్మదేవుడికి కూడా తెలియదట!

అందుకే ఈ చిక్కుల నుంచి తప్పించుకోవడానికే 'అల వైకుంఠపురములో'.. 'సరిలేరు నీకెవ్వరు' టీమ్స్ తెలివిగా నాన్-బాహుబలి రికార్డులు అని ప్రకటించుకుంటున్నారు. బన్నీ.. మహేష్ ఇద్దరూ బాహుబలి రికార్డులను బ్రేక్ చెయ్యలేమని ఫిక్స్ అయ్యి 'నాన్ బాహుబలి రికార్డు' లతో సరిపెట్టుకుంటున్నారని.. ఇది ఒకరకంగా 'బాహుబలి'కి మరింత ప్రచారం కల్పించినట్టేనని సోషల్ మీడియాలో కొందరు నెటిజన్లు కామెంట్ చేస్తున్నారు.  ఎలాగూ ఆ రికార్డుల ను బ్రేక్ చెయ్యలేనప్పుడు రికార్డుల సంగతి ప్రస్తావించడం ఎందుకు.. నలుగురిలో  నవ్వుల పాలు కావడం ఎందుకని కొందరు సెటైర్లు కూడా వేస్తున్నారు.