అనుపమ.. వాటే 'చిరు' కోరిక నానా!!

మన తెలుగు సీనియర్ హీరోలకు హీరోయిన్లు దొరకట్లేదు అనేది వాస్తవం. ఆ ఎఫెక్ట్ మెగాస్టార్ చిరంజీవికి కూడా ఉంది. అందుకే ఆయన అప్పట్లో 'ఖైదీ నెం 150' కోసం చాలా పేర్లను అనుకుని.. ఫైనల్ చేసి.. మిస్ చేసుకుని.. చివరకు కాజల్ అగర్వాల్ కు భారీ పైకం ఇచ్చి ఓకే చేయించారని అప్పట్లో టాక్ వినిపించింది. అయితే ఇప్పుడు మెగాస్టార్ కు సైతం దిమ్మతిరిగే ఆఫర్ ఇస్తోంది యంగ్ బ్యూటి అనుపమ పరమేశ్వరన్.

అసలు అనుపమకు తెలుగులో వరుసగా సినిమాలున్నాయి. ఇప్పటికే నాలుగు హిట్లు కొట్టింది. ఐదవ దానికోసం వెయిటింగ్. ఈ సందర్భంగా అమ్మడు తనకు ఎవరితో చేయాలని కోరిక ఉందో చెబుతూ.. ముందు రాజమౌళి గారి సినిమాలో చిన్న సీన్ అయినా చేయాలని ఉన్నట్లు చెప్పింది. తరువాత మాత్రం షాకిచ్చింది. ''నేను మొన్న ఖైదీ నెం 150 చూశాను. అసలు చిరంజీవి సార్ 150 సినిమాలు చేశారంటే షాకింగ్ గా ఉంది. పైగా ఆ వయస్సులో ఆయన డ్యాన్స్ అండ్ ఎనర్జీ చూస్తే పిచ్చెక్కిపోయింది. అందుకే ఆయన సినిమాలో ఒక నిమిషం నిడివి ఉన్న చిన్న పాత్రను చేయడానికి అయినా రెడీ. ఆయన పిలిస్తే వెళిపోతా'' అంటూ సెలవిచ్చింది అనుపమ. మరి హీరోయిన్ గా చేస్తుందో లేదో తెలియదు కాని.. చిరంజీవి సినిమాలో పాత్ర కావాలంటూ ఓపెన్ గా చెప్పేసింది.

చూస్తుంటే 'సైరా' సినిమా కోసం ఏదన్నా రిక్వయిర్మెంట్ ఉంటే వెంటనే రామ్ చరణ్‌ ఈమెకు కబురంపితే బెటరేమో అనిపిస్తోంది కదూ. అయినా సరే.. అసలు అనుపమ చిరు కోరికను విని ఆమె అభిమానులు కూడా స్టన్ అయిపోతున్నారు. ఈమె నటించిన ఉన్నది ఒకటే జిందగి ఈ శుక్రవారం రిలీజవుతోంది.