కాజ‌ల్‌.. మ‌హాన‌టిలో ఎక్క‌డా క‌నిపించ‌లేదే?

తెలుగు సినిమాలో హీరోయిన్ కు ఇచ్చే విలువ ఎంత‌? అంటే.. స‌మాధానం చెప్పాల్సిన అవ‌స‌ర‌మే లేదు. అలాంటిది అప్పుడెప్పుడో మ‌ర‌ణించిన సావిత్రి అనే న‌టి బ‌యోపిక్ ను సినిమాను తీయ‌టం అంటేనే.. ఆమె రేంజ్ ఏమిటో ఇట్టే అర్థ‌మ‌వుతుంది. ఆమె జీవితంలో ఉండే సినిమాటిక్ కోణాలెన్నో. ద‌శాబ్దాలు గ‌డిచినా.. ఆమె ఇమేజ్ చెక్కు చెద‌ర్లేదు స‌రిక‌దా.. సావిత్రి బ‌యోపిక్ ను చూసేందుకు ఫ‌స్ట్ డే వ‌స్తున్న ఆద‌ర‌ణ అద‌ర‌హో అనేస్తున్నారు. అదే.. సావిత్రి మాయాజాలం.

టాలీవుడ్‌లో ఎంత మంది హీరోయిన్లు వ‌చ్చినా.. ఉన్నా.. సావిత్రి స్థానాన్ని ట‌చ్ చేయ‌టం ఎవ‌రికి సాధ్యం కాదు. మ‌హాన‌టి సినిమాకు సంబంధించి ఇప్ప‌టివ‌ర‌కూ వెలువ‌డిన రివ్యూల‌న్నీ పాజిటివ్ గా ఉండ‌టం ఒక ఎత్తు అయితే.. ఒక తెలుగు సినిమాకు సంబంధించి ఎలాంటి డివైడ్ టాక్ లేకుండా ఉండ‌టం ఆస‌క్తిక‌రంగా చెప్పాలి. ఈ క్రెడిట్ కూడా సావిత్రికే చెల్లుతుంది.

ఇదంతా ఒక ఎత్తు అయితే.. ఈ సినిమాకు సంబంధించి ఒక ఆస‌క్తిక‌ర‌మైన అంశం ఇప్పుడు హాట్ టాపిక్ గా మారింది. ఈ సినిమాలో కాజ‌ల్ ఉన్న‌ట్లుగా పోస్ట‌ర్లు కొన్ని బ‌య‌ట‌కు వ‌చ్చాయి. సావిత్రి సినిమాలో ఆమె పాత్ర ఏమిటి? అన్న‌ది ఆస‌క్తిక‌రంగా మారి.. ప్ర‌శ్నిస్తే.. సినిమా విడుద‌ల అయ్యే వ‌ర‌కూ వెయిట్ చేయాల‌న్న మాటను చెప్పారు. తీరా సినిమా విడుద‌ల అయ్యాక‌.. భూత‌ద్దం వేసుకొని చూసినా కాజ‌ల్ ఎక్క‌డా క‌నిపించ‌లేదు. కాజ‌ల్ లాంటి స్టార్ హీరోయిన్ సీన్ల‌ను ఎత్తేయ‌ట‌మా? అని ఆశ్చ‌ర్య‌పోతున్నారు. ఎడిటింగ్ లో పోయిందా?  కావాల‌నే తీసేశారా? అన్న‌ది ఇప్పుడు ప్ర‌శ్న‌గా మారింది. దీనికి స‌రైన జ‌వాబు మ‌హాన‌టి టీం మాత్ర‌మే చెప్ప‌గ‌ల‌ద‌ని చెప్ప‌క త‌ప్ప‌దు.