ఫస్ట్ లుక్: విశ్వరూపం.. ర్రెండోస్సారి!!

విశ్వనటుడు కమల్ హాసన్.. ఇప్పటికే చాలాసార్లు ఆయన నట విశ్వరూపాన్ని మనకు చూపించేశారు. ఎంతగా నటించినా.. ఎంత కొత్తగా చేసినా తీరని తపన ఆయనది. అందుకే తనే విశ్వరూపం అంటూ సినిమా కూడా చేసేశారు. ఎన్నో ఇబ్బందుల తర్వాత విడుదలైన ఆ చిత్రం సెన్సేషనల్ హిట్ సాధించింది. ఆ మూవీ చివర్లో అర్ధాంతరంగా ఆగిపోగా.. మిగిలిన భాగం ఇండియాలో విశ్వరూపం2లో చూడమని టైటిల్ కార్డ్స్ వేస్తారు. అంటే బాహుబలి2 తరహా ఐడియా ముందు కమల్ కే వచ్చిందనమాట.

కాకపోతే అప్పటి నుంచి ఈ విశ్వరూపం సీక్వెల్ కు మోక్షం లభించలేదు. నిర్మాతల నుంచి సపోర్ట్ అందకపోవడంతో దాదాపుగా పూర్తయిపోయిన చిత్రం కూడా ఆగిపోయింది. కమల్ కు ఇలాంటివి కొత్త కాదు కానీ.. తనే దర్శకత్వం వహించి విశ్వరూపంపై ఆయన ఎంతో ప్రేమ పెంచుకున్నారు. ఎట్టకేలకు ఈ సినిమా నిర్మాణాన్ని తన హోం బ్యానర్ రాజ్ కమల్ ఇంటర్నేషనల్ కిందకు తీసుకొచ్చిన కమల్.. ఇప్పుడు ఫస్ట్ లుక్ కూడా ఇచ్చేశారు. మొహానికి కట్లు కట్టుకుని సూటుతో ఉన్న కమల్ హాసన్.. గుండెలపై ఎగురుతున్న మువ్వన్నెల జాతీయ పతాకం ఈ పోస్టర్ లో కనిపిస్తాయి.  జెండా మీదుగా తన గుండెలపై చెయ్యి వేసుకున్న కమల్ ఈ పోస్టర్ కి అసలు సిసలైన అట్రాక్షన్. కాకపోతే తొలి భాగంలో కాసేపు బ్రాహ్మణ డ్యాన్సర్ గా.. కాసేపు ఒక అఫ్గాన్ తీవ్రవాదిగా కనిపించిన కమల్.. ఇప్పడు ఇలా కనిపించడం.. ఏదో కొత్తగానే ఉంది.

రచన-దర్శకత్వ బాధ్యతలను కమల్ హాసన్ స్వయంగా నిర్వహించగా.. నిర్మాతలుగా సోదరుడు చంద్రహాసన్.. కమల్ హాసన్ లు వ్యవహరిస్తున్నారు. 2017లోనే ఈ సినిమాను విడుదల చేయాలనే లక్ష్యంతో ఉన్నట్లు పోస్టర్ లోనే చెప్పారు కమల్  హాసన్.

Like Us on Facebook : https://www.facebook.com/Tupakidotcom/