అమెరికాలో 2 మిలియన్లు వేసుకోవచ్చా..?

అమెరికాలో తెలుగు ప్రేక్షకుల అభిరుచికి తగ్గ సినిమా వస్తే దాని ఫలితం అంచనా వేయడం కూడా కష్టం. చిన్నా పెద్దా తేడా చూడకుండా అద్భుతమైన ఆదరణ చూపిస్తారు అక్కడి జనాలు. గతంలో ‘పెళ్ళిచూపులు’.. ‘ఫిదా’.. ‘అర్జున్ రెడ్డి’ లాంటి సినిమాలు అక్కడ వసూళ్ల ప్రభంజనం సృష్టించాయి. ‘పెళ్ళిచూపులు’ దాదాపు 1.4 మిలియన్ డాలర్లు కొల్లగొడితే మిగతా రెండు సినిమాలూ రెండు మిలియన్ డాలర్ల మార్కును కూడా దాటేశాయి. ‘అఆ’ లాంటి స్టార్లు లేని సినిమా 2.5 మిలియన్ డాలర్ల మార్కుకు చేరువగా వెళ్లడం విశేషం. ఇప్పుడు ‘మహానటి’ సైతం ఇదే బాటలో సాగేలా కనిపిస్తోంది. ఈ చిత్రానికి ఎంత గొప్ప టాక్ వచ్చిందో తెలిసిందే. యుఎస్ తెలుగు ప్రేక్షకుల అభిరుచికి చక్కగా సరిపోయే క్లాస్ టచ్ ఉన్న సినిమా ఇది. ఈ చిత్రం వాళ్లకెంత నచ్చిందో ప్రిమియర్లతోనే తేలిపోయింది. మంగళవారం ప్రిమియర్లతోనే ఈ చిత్రం 3 లక్షల డాలర్లకు పైగా వసూళ్లు రాబట్టడం విశేషం.

బుధవారం కూడా ఈ చిత్రానికి మంచి స్పందనే వస్తోంది. మామూలుగా వీక్ డేస్‌ మధ్యలో జనాలు థియేటర్లకు రారు. కానీ ఈ చిత్రానికి మాత్రం బుధవారం కూడా 2 లక్షల డాలర్లకు పైగా వసూళ్లు వచ్చే అవకాశముంది. వీకెండ్లో ఈ చిత్రానికి భారీ వసూళ్లు వస్తాయని.. ఈజీగా మిలియన్ మార్కును దాటేస్తుందని అంచనా వేస్తున్నారు. ‘మహానటి’ లాంటి చిత్రానికి అక్కడ లాంగ్ రన్ కూడా ఉండే అవకాశముంది. రెండో వారాంతంలో కూడా జోరు కొనసాగవచ్చు. ఈ చిత్రం ఫుల్ రన్లో 2 మిలియన్ మార్కును కూడా అందుకునే అవకాశాల్ని కొట్టిపారేయలేమని అంటున్నారు అక్కడి ట్రేడ్ పండిట్లు. ఈ చిత్ర యుఎస్ హక్కులు ఓ మోస్తరు ధరే పలికాయి. వసూళ్లు పెట్టుబడి మీద కొన్ని రెట్లు వచ్చే అవకాశాలు కనిపిస్తున్నాయి. ‘క్షణం’.. ‘పెళ్ళిచూపులు’.. ‘అర్జున్ రెడ్డి’ తరహాలోనే పెట్టుబడి-లాభాల లెక్కల్లో ఇది పెద్ద హిట్లలో ఒకటిగా నిలిచే అవకాశాలున్నాయి.