మంచు మనోజ్.. ఈ పాత్రలేంటి బాబూ?

పాపం మంచు మనోజ్.. అతడి కెరీర్ చాలా ఇబ్బందికర పరిస్థితుల్లో ఉందిప్పుడు. అతను హిట్టు ముఖం చూసి చాలా కాలం అయిపోయింది. శౌర్య.. ఎటాక్.. గుంటూరోడు.. ఒక్కడు మిగిలాడు.. ఇలా గత కొన్నేళ్లలో అతను చేసిన సినిమాలన్నీ దారుణమైన ఫలితాన్నిచ్చాయి. అందులోనూ చివరగా మనోజ్ నుంచి వచ్చిన ‘ఒక్కడు మిగిలాడు’ అతడి కెరీర్లోనే బిగ్గెస్ట్ డిజాస్టర్ గా నిలిచింది. ఈ నేపథ్యంలో అతడి భవిష్యత్ ప్రశ్నార్థకంగా మారింది. ఇలాంటి సమయంలో మనోజ్ ఊరూ పేరూ లేని సినిమాల్లో స్పెషల్ క్యారెక్టర్లకు తయారవుతుండటం అతడి ఇమేజ్ ను మరింత దెబ్బ తీస్తోంది.

ఇటీవలే విడుదలైన తరుణ్ సినిమా ‘ఇది నా లవ్ స్టోరీ’ మనోజ్ చిన్న పాత్ర చేశాడు. అందులో హీరో హీరోయిన్లు ఒక సినిమా చూస్తుంటారు. అది మనోజ్ సినిమానే. అతను ప్రేమ గురించి.. అమ్మాయిల గురించి రెండు డైలాగులు చెప్పి వెళ్లిపోతాడు. పూర్తిగా ఫాం కోల్పోయిన తరుణ్ సినిమాలో అలాంటి క్యామియో మనోజ్ ఎందుకు చేయాల్సి వచ్చిందో ఏమిటో మరి? అది చాలదన్నట్లు సీనియర్ హీరో శ్రీకాంత్ ప్రధాన పాత్రలో తెరకెక్కుతున్న ‘ఆపరేషన్ 2019’లోనూ మనోజ్ ఇలాంటి స్పెషల్ క్యారెక్టరే చేస్తున్నాడట. అందులో అతను పోలీస్ పాత్రలో కనిపిస్తాడట. శ్రీకాంత్ మార్కెట్ ఏంటి.. అతడి సినిమాల పరిస్థితేంటి అన్నది కొత్తగా చెప్పాల్సిన పని లేదు. అలాంటి హీరో సినిమాలో స్పెషల్ క్యారెక్టర్ చేసి మనోజ్ ఏం బావుకోబోతున్నట్లు? కొంచెం పేరున్న హీరోల సినిమాల్లో స్పెషల్ రోల్స్ చేస్తే మనోజ్ కు ఏమైనా కలిసొస్తుంది కానీ.. తరుణ్-శ్రీకాంత్ లాంటి హీరోల సినిమాల్లో నటించడం వల్ల ఒరిగేదేంటి? అసలే హీరోగా తన కెరీర్ ప్రశ్నార్థకంగా ఉన్న సమయంలో మనోజ్ ఇలాంటి సాహసాలెందుకు చేస్తున్నట్లో?