శిష్యుడితో ముందు గురువుతో త‌ర్వాత‌!

2020-21 మ‌హ‌మ్మారీ క్రైసిస్ ని మెగాబాస్ చిరంజీవి ఎంతో తెలివిగా స‌ద్వినియోగం చేసుకుని వ‌రుస ప్రాజెక్టుల‌కు క‌మిటైన సంగతి తెలిసిందే. న‌లుగురు ద‌ర్శ‌కులు వినిపించిన స్క్రిప్టుల్ని ఫైన‌ల్ చేసి ఒక్కో సినిమాని ప‌ట్టాలెక్కించి షూటింగుల్లో పాల్గొంటున్నారు. తొలిగా కొర‌టాల ఆచార్య విడుద‌ల‌కు సిద్ధ‌మ‌వుతోంది. త‌దుప‌రి మోహ‌న్ రాజాతో గాడ్ ఫాద‌ర్ చిత్రీక‌ర‌ణ‌తో బిజీ అయ్యారు. ఇటీవ‌లే మెహ‌ర్ ర‌మేష్ తో భోళా శంక‌ర్.. బాబీతో వాల్తేర్ వీర‌న్న .. ప్రారంభించిన సంగ‌తి తెలిసిందే.

ఇవ‌న్నీ బ్యాక్ టు బ్యాక్ విడుద‌ల‌య్యేందుకు ఛాన్సుంది. 2022లోనే చిరు నటిస్తున్న రెండు మూడు చిత్రాలు విడుద‌ల కానున్నాయి. ఇదిలా ఉంటే మ‌రో న‌లుగురు ద‌ర్శ‌కుల‌కు మెగాస్టార్ ఆఫ‌ర్లు ఇచ్చారు. ఇందులో మారుతి స‌హా అగ్ర‌ద‌ర్శ‌కులు ఉన్నార‌ని తెలిసింది.

ఇక‌పోతే ఇటీవ‌లే యువ‌ద‌ర్శ‌కుడు వెంకీ కుడుముల‌కు చిరు ఓకే చెప్పారు. ఈ చిత్రాన్ని ఆర్.ఆర్.ఆర్ నిర్మాత డివివి దానయ్య తెర‌కెక్కించ‌నున్నారు. చిరుతో దాన‌య్య‌కు బ్యాక్ టు బ్యాక్ రెండు సినిమాల డీల్ కుద‌ర‌డంతో ఇప్పుడు మ‌రో దర్శ‌కుడి కోసం దాన‌య్య సెర్చ్ లో ఉన్నార‌ట‌. ఆస‌క్తిక‌రంగా మాట‌ల మాంత్రికుడు త్రివిక్ర‌మ్ తో చిరు సినిమాని సెట్ చేస్తార‌ని టాక్ బ‌లంగా వినిపిస్తోంది. వెంకీ కుడుముల గురూజీ త్రివిక్ర‌మ్ వ‌ద్ద‌నే శిష్యరికం చేసిన సంగ‌తి తెలిసిందే. అత‌డు నెమ్మ‌దిగా కెరీర్ ప‌రంగా షైన్ అవుతున్నాడు. ఇప్పుడు ఏకంగా మెగా బాస్ తోనే అవ‌కాశం అందుకున్నాడు. మ‌రోవైపు త్రివిక్ర‌మ్ అటు మ‌హేష్ తో సినిమాని ముగించి చిరు కోసం బౌండ్ స్క్రిప్ట్ రెడీ చేస్తార‌ని గుస‌గుస‌లు వినిపిస్తున్నాయి. చిరు-త్రివిక్ర‌మ్ -దాన‌య్య మూవీ అధికారికంగా ఫిక్స‌యితే .. గురుశిష్యులిద్ద‌రికీ చిరు లాకైన‌ట్టే భావించ‌వ‌చ్చు.