నెవర్ బిఫోర్ క్యారెక్టర్ లో నాని

వైవిధ్యమైన పాత్రలు.. సినిమాలతో వరుస హిట్లు కొడుతూ తన ఇమేజ్ పెంచుకున్నాడు నేచురల్ స్టార్ నాని. ఐతే ఈ మధ్య అతడి పాత్రలు, సినిమాలు రొటీన్ అయిపోతున్నాయనే విమర్శలు వచ్చాయి. ముఖ్యంగా నాని చివరి సినిమా ‘మిడిల్ క్లాస్ అబ్బాయి’ విషయంలో ఈ విమర్శలు బాగా ఎక్కువయ్యాయి. దీంతో తన తర్వాతి సినిమా విషయంలో వైవిధ్యం చూపించక తప్పని పరిస్థితి నెలకొంది.

‘వెంకటాద్రి ఎక్స్‌ ప్రెస్’.. ‘ఎక్స్‌ ప్రెస్ రాజా’ లాంటి భిన్నమైన సినిమాలు తీసిన మేర్లపాక గాంధీతో నాని చేస్తున్న కొత్త సినిమా ‘కష్ణార్జున యుద్ధం’ కొంచెం కొత్తగానే ఉండొచ్చనిపిస్తోంది. ఇందులో నాని.. కృష్ణ - అర్జున్ అనే రెండు పాత్రలు చేస్తున్న సంగతి తెలిసిందే. ఈ పాత్రలేంటన్నది తాజాగా వెల్లడైంది. ఇందులో కృష్ణ చిత్తూరు ప్రాంతంలో ఉండే ఒక దొంగ అట. అర్జున్ విదేశాల్లో పుట్టి పెరిగిన ఒక రాక్ స్టార్. వీళ్లిద్దరికీ అనుకోకుండా వైరం మొదలవుతుంది. ఆ యుద్ధంలో ఎవరు గెలిచారన్నదే ఈ కథ.

ఇందులో కృష్ణ పాత్ర సినిమాకే హైలైట్‌ గా ఉంటుందని.. తొలిసారి దొంగ క్యారెక్టర్ చేస్తున్న నాని అదరగొట్టేశాడని.. ఆ పాత్ర చాలా వినోదాత్మకంగా ఉంటుందని.. చిత్తూరు యాసలో చెప్పే డైలాగులు ఈ పాత్రకు ప్రత్యేకత తీసుకొచ్చాయిని అంటున్నారు. సంక్రాంతి సందర్భంగా కృష్ణ - అర్జున్ ఫస్ట్ లుక్స్‌ తో పాటు వెరైటీగా అనిపించే ఓ జానపద గేయాన్ని కూడా లాంచ్ చేశారు. ఇవి మంచి స్పందన తెచ్చుకున్నాయి. అనుపమ పరమేశ్వరన్ కథానాయికగా నటిస్తున్న ఈ చిత్రం వేసవికి ప్రేక్షకుల ముందుకొస్తుంది.