మెగాస్టార్ రీల్ హీరో మాత్రమే కాదు రియల్ హీరో: సీనియర్ స్టార్ యాక్ట్రెస్

మెగాస్టార్ అంటే టాలీవుడ్ ఫిల్మ్ ఇండస్ట్రీలో ఓ ఉప్పెన అని చెప్పాలి. చిరంజీవి ఎంటరయ్యాకే తెలుగు సినిమా పాటలలో డాన్స్ మొదలైంది. డాన్స్ తో పాటు కొత్త స్టెప్పులు మొదలయ్యాయి. ముఖ్యంగా బ్రేక్ డాన్స్ పరిచయం అయిందని చెప్పాలి. అయితే అలనాటి హీరోయిన్స్ అందరితో మెగాస్టార్ చిందేసిన విషయం తెలిసిందే. చిరు ఎంతమంది హీరోయిన్లతో నటించినా అందులో కొందరు హీరోయిన్లు ప్రత్యేకంగా నిలిచిపోతారు. అలాంటి హీరోయిన్లలో ఒకరు సుహాసిని మణిరత్నం. ఆమె చిరుతో కలిసి చాలా సినిమాలలో నటించింది. ఇద్దరు కలిసి సూపర్ హిట్స్ అందుకున్నారు. అయితే మెగాస్టార్ తన హీరోయిన్లను ఎంత గౌరవిస్తారో.. అంతే జాగ్రత్తగా కాపాడేవారట. అవును.. ఇలాంటి విషయాలు స్వయంగా హీరోయిన్స్ చెబితే బాగుంటుంది కదా!

ఇటీవలే సుహాసిని తన హీరో చిరంజీవిని 'రీల్ హీరో మాత్రమే కాదు రియల్ హీరో' అంటూ పొగిడేసింది. అందుకు గల కారణం కూడా సుహాసిని బయట పెట్టింది. అప్పట్లో ఓ సినిమా షూటింగ్ నేపథ్యంలో కేరళ వెళ్లారట. కొందరు ఆకతాయిలు రోడ్డు మీద తప్ప తాగి చిరంజీవి, సుహాసిని ప్రయాణిస్తున్న కారును ఆపి.. కారు మీదికి బీర్ బాటిళ్లు విసిరారట. అంతే ఆ సమయంలో చిరుకి కోపం వచ్చి  తన దగ్గరున్న లైసెన్స్ రివాల్వర్ తీసి వాళ్లకు గురి పెట్టాడట. ఆ దెబ్బతో ఆ ఆకతాయిలు భయపడి అక్కడి నుండి పారిపోయారట. ఈ విషయం చెబుతూ సుహాసిని "చిరు స్క్రీన్ మీదే కాదు.. స్క్రీన్ బయట కూడా హీరోనే" అంటుంది. అలా అనడానికి కూడా ఆ సంఘటన రుజువని చెప్పుకొచ్చింది ఎవర్ గ్రీన్ సుహాసిని. ఆ సంఘటన గురించి పక్కన పెడితే మెగా అభిమానులు మాత్రం సుహాసిని మాటలతో ఫుల్ ఖుషి అయిపోతున్నారు.