'ఊరికొక్క రాజా' సాంగ్: జానీ కొరియోగ్రఫీలో అదరగొట్టిన పునీత్ - సయేషా

కన్నడ పవర్ స్టార్ పునీత్ రాజ్ కుమార్ - సయేషా సైగల్ హీరో హీరోయిన్లుగా న‌టిస్తోన్న తాజా చిత్రం ''యువ‌ర‌త్న'' (ది పవర్ ఆఫ్ యూత్). ఈ యాక్షన్ ఎంటర్ టైనర్ కి సంతోష్ ఆనంద్ రామ్ ద‌ర్శ‌క‌త్వం వ‌హిస్తున్నాడు. 'కేజీఎఫ్' చిత్రాన్ని నిర్మించిన విజ‌య్ కిర‌గందూర్.. హోంబలే ఫిల్మ్స్ బ్యానర్ పై ఈ చిత్రాన్ని రూపొందిస్తున్నాడు. రగ్బీ ఆట నేపథ్యంలో వస్తున్న ఈ చిత్రాన్ని తెలుగులో కూడా అదే పేరుతో విడుదల చేయనున్నారు. ఇప్పటికే విడుదల చేసిన టీజర్ - సాంగ్స్ మంచి రెస్పాన్స్ తెచ్చుకున్నాయి. ఈ క్రమంలో తాజాగా 'ఊరికొక్క రాజా' అనే వీడియో సాంగ్ ను రిలీజ్ చేశారు.

'ఊరికొక్క రాజా.. ఆ రాజుకొక్క రాణి.. ఆ రాజా రాణి మనమేనంట లవ్ యూ జాను' అంటూ సాగిన ఆ పాటకు థమన్ ట్యూన్ కంపోజ్ చేశాడు. లిరిసిస్ట్ కళ్యాణ్ చక్రవర్తి సాహిత్యం అందించగా.. సింగర్స్ దినకర్ - రమ్య బెహరా ఆలపించారు. ఈ సాంగ్ లో జానీ మాస్టర్ కొరియోగ్రఫీ చేసిన స్టెప్స్ బాగున్నాయి. పునీత్ - సాయేషా ఎప్పటిలాగే తమ డ్యాన్సులతో ఆకట్టుకున్నారు. అందులో వీణ స్టెప్ స్పెషల్ గా నిలిచింది. ఈ చిత్రానికి వెంకటేష్ అంగురాజ్ సినిమాటోగ్రఫీ అందించారు. ప్ర‌కాశ్ రాజ్‌‌ - సోనూ గౌడ‌ - దిగంత్ మంచ‌లే - ధ‌నంజ‌య్ ఈ చిత్రంలో ఇతర కీల‌క పాత్ర‌ల్లో న‌టిస్తున్నారు. 'యువరత్న' చిత్రాన్ని త్వరలోనే ప్రేక్షకుల ముందుకు తీసుకురానున్నారు.