ట్రైలర్ తోనే 'వకీల్ సాబ్' అన్ని లెక్కలు సరిచేసాడుగా..!

రాజకీయాల్లోకి వెళ్లిన పవన్ కళ్యాణ్ సినిమాలకు దూరమయ్యాడని చాలా అభిమానులు బాధ పడ్డారు. అయితే మనసు మార్చుకొని మళ్ళీ సినిమాల్లో నటించాలని డిసైడ్ అయ్యాడని తెలియగానే సంతోషించారు. అదే సమయంలో 'పింక్' రీమేక్ తో రీ ఎంట్రీ ఇస్తున్నాడని తెలిసి నిరాశకు గురయ్యారు. ఇక ప్రమోషన్ కంటెంట్ చూసి 'పింక్' చిత్రాన్ని ఇష్టపడిన వాళ్లు మహిళా ప్రాధాన్యత తగ్గించి 'వకీల్ సాబ్' ని పక్కా కమర్షియల్ సినిమాగా మార్చేస్తున్నారని కామెంట్స్ చేశారు. ఈ నేపథ్యంలో గతేడాది ఎప్పుడో రిలీజ్ కావాల్సిన వాయిదా పడుతూ వచ్చి ఏప్రిల్ 9న రావడానికి సిద్ధమైంది.

అయితే రిలీజ్ డేట్ దగ్గర పడుతున్నా సినిమాపై బజ్ ఏ మాత్రం రావడం లేదని టాక్ వచ్చింది. ఇలాంటి పరిస్థితుల్లో సోమవారం 'వకీల్ సాబ్' ట్రైలర్ ని వదిలారు. ఈ ట్రైలర్ వ్యూస్‌ - లైక్స్‌ పరంగా టాలీవుడ్‌ లో సరికొత్త రికార్డులను సృష్టిస్తోంది. విడుదలైన 24 గంటల్లోనే 22.44 మిలియన్ల వ్యూస్‌ తో..1 మిలియన్‌ లైక్స్‌ తో రికార్డ్ క్రియేట్ చేసింది. ఈ ఘనత సాధించిన ఫస్ట్ తెలుగు సినిమాగా నిలిచింది. ఇన్నాళ్ళు సైలెంట్ గా ఉన్న వకీల్ సాబ్ ఇలా ఒక్క ట్రైలర్ తో ఇండస్ట్రీలో లెక్కలన్నీ సరిచేస్తూ పవన్‌ పవర్‌ ఏంటో మరోసారి చూపించింది. అసలు బజ్ లేదు అనుకున్న సినిమా కాస్తా 'వకీల్ సాబ్' మానియా కనిపించేలా చేసింది. దీంతో ఈ సినిమాపై భారీ బడ్జెట్ పెట్టిన ప్రొడ్యూసర్స్ - పవర్ స్టార్ అభిమానులు 'వకీల్ సాబ్' భారీ ఓపెనింగ్స్ కి తిరుగులేదని నమ్మకంగా ఉన్నారని తెలుస్తోంది.