వెంకీ మామకు ఎఫ్2 ఝలక్

సంక్రాంతి సినిమాల్లో యునానిమస్ విన్నర్ గా బ్లాక్ బస్టర్ హిట్ కొట్టిన ఎఫ్2 ఆనందం ఇంకా వెంకటేష్ అభిమానుల్లో తోణికిసలాడుతోంది. అప్పుడెప్పుడో కలిసుందాం రా-రాజా టైం నాటి వసూళ్లు ఇన్నాళ్ళకు కళ్ళజూడటంతో వాళ్ళ ఆనందానికి అంతు లేకుండా పోతోంది. ఇప్పుడు దీని ప్రభావం నేరుగా త్వరలో షూటింగ్ వెళ్లబోయే వెంకీ మామ మీద పడుతోందని ఇన్ సైడ్ టాక్. దానికి కారణాలు స్పష్టంగా ఉన్నాయి. ఎఫ్2 తర్వాత వెంకీ కామెడీ టైమింగ్ మీద అంచనాలు అమాంతం పెరిగిపోయాయి.

వెంకీ మామ అయినా లేక మరో సినిమా అయినా ఎఫ్2 బ్రాండింగ్ ఎఫెక్ట్ ఖచ్చితంగా ఉంటుంది. అదే స్థాయి వినోదాన్ని ప్రేక్షకులు ఆశిస్తారు. అంతకు ఎక్కువ ఉన్నా ఓకే కాని తక్కువ ఉంటే మాత్రం అది ప్రభావం చూపిస్తుంది. అందుకే వెంకీ మామ దర్శకుడు బాబీ స్క్రిప్ట్ ని మరోసారి క్షుణ్ణంగా పునఃపరిశీలన చేస్తున్నట్టు సమాచారం.

సురేష్ ఈ విషయంలో ప్రత్యేక శ్రద్ధ తీసుకుంటున్నట్టు టాక్. తనకు నచ్చే దాకా రాజీ పడే ప్రసక్తి లేని నైజం ఉన్న సురేష్ బాబు దాని కోసం ఎన్ని మార్పులైనా ఎన్ని నెలలైనా భరిస్తారు కాని అంత ఈజీగా కన్విన్స్ కారు.

దానికి తోడు దీనికి ముగ్గురు నిర్మాతలు. మరో భాగస్వామి అయిన కోన వెంకట్ స్వయానా రచయిత కూడా. బాబీతో కో ఆర్డినేషన్ ఈయనకు బాగున్నప్పటికీ పెట్టుబడితో ముడిపడిన అంశం కాబట్టి ఒకటికి రెండు సార్లు క్రాస్ చెక్ చేసుకోవాల్సిందే. ఇంకా వెంకీకు తగ్గ జోడి కోసం వేట సాగుతోంది. నాగ చైతన్యకు రకుల్ ప్రీత్ సింగ్ ని కన్ఫర్మ్ చేసారు కాబట్టి ఓ పనైపోయింది. సో ఎఫ్2 హ్యంగ్ ఓవర్ లో ఉన్న జనాన్ని మెప్పించాలంటే వెంకీ మామ చాలా కసరత్తులే చేయాలి