దిల్ రాజు@2025.. ప్లాన్ ఎలా ఉందంటే..

టాలీవుడ్ నిర్మాత దిల్ రాజు గురించి అందరికీ తెలిసిందే. డిస్ట్రిబ్యూటర్ గా కెరీర్ స్టార్ట్ చేసిన ఆయన.. ఇప్పుడు స్టార్ ప్రొడ్యూసర్ గా మారారు. అనేక భారీ ప్రాజెక్టులతో పాటు మీడియం రేంజ్ సినిమాలను కూడా నిర్మిస్తున్నారు. తన వెంకటేశ్వర క్రియేషన్స్, దిల్ రాజు ప్రొడక్షన్ బ్యానర్ల లైనప్ లో వరుస చిత్రాలు చేర్చుతున్నారు. అదే క్రమంలో మూవీలు రిలీజ్ చేసేందుకు రెడీ అవుతున్నారు.

2024లో రెండు సినిమాలను ప్రేక్షకుల ముందుకు తీసుకొచ్చిన దిల్ రాజు.. అనుకున్న స్థాయిలో వాటితో మెప్పించలేకపోయారు. 2025లో మాత్రం వరుసగా సినిమాలు రిలీజ్ చేయనున్నారు. బిగ్గెస్ట్ మూవీ సీజన్ సంక్రాంతి నుంచి తన చిత్రాల సందడిని స్టార్ట్ చేయనున్నారు. పొంగల్ స్పెషల్ గా ఆడియన్స్ కు డబుల్ బొనాంజా ఇస్తున్నారు దిల్ రాజు. రెండు సినిమాలు రిలీజ్ చేస్తున్న విషయం తెలిసిందే.

కోలీవుడ్ డైరెక్టర్ శంకర్ దర్శకత్వంలో స్టార్ హీరో రామ్ చరణ్ నటిస్తున్న గేమ్ ఛేంజర్.. సంక్రాంతి కానుకగా జనవరి 10వ తేదీన రిలీజ్ చేయనున్నారు. ఆ మూవీతో 2025 క్యాలెండర్ మొదలుపెట్టనున్నారు. అదే సమయంలో సీనియర్ హీరో వెంకటేష్, బ్లాక్ బస్టర్ డైరెక్టర్ అనిల్ రావిపూడి కాంబోలో తెరకెక్కుతున్న సంక్రాంతికి వస్తున్నాం మూవీ కూడా రిలీజ్ చేయనున్నారు.

ఆ తర్వాత యంగ్ హీరో నితిన్ నటిస్తున్న తమ్ముడు మూవీని రిలీజ్ చేయనున్నారు. శివరాత్రి కానుకగా విడుదల చేస్తామని ఇటీవల ప్రకటించారు దిల్ రాజు. కొరియోగ్రాఫర్ యష్ మాస్టర్ ను హీరోగా పరిచయం చేస్తూ తెరకెక్కిస్తున్న మూవీని కూడా 2025లోనే రిలీజ్ చేయనున్నారు. బలగంతో భారీ హిట్ అందుకున్న వేణు డైరెక్షన్ లో ఎల్లమ్మ ప్రాజెక్ట్ ను ఇప్పటికే అనౌన్స్ చేసిన విషయం తెలిసిందే.

ఎందరో హీరోల పేర్లు వినిపించినా.. చివరకు నితిన్ నటిస్తున్న ఆ సినిమాను వచ్చే ఏడాది పాటు దసరా కానుకగా రిలీజ్ చేయాలని దిల్ రాజు ప్లాన్ చేస్తున్నట్లు వార్తలు వస్తున్నాయి. తనకు కొడుకు వరస అయ్యే ఆశిష్ హీరోగా రూపొందుతున్న సెల్ఫిష్ మూవీని 2025లో విడుదల చేయాలని దిల్ రాజు అనుకుంటున్నట్లు టాక్ వినిపిస్తోంది. సుకుమార్‌ రైటింగ్స్‌ తో కలిసి దిల్ రాజు నిర్మిస్తున్న ఆ చిత్రం ప్రస్తుతం హోల్డ్ లో ఉంది.

పుష్ప-2 వర్క్స్ అయ్యాక.. సుకుమార్ సలహాలు, సూచనలతో మళ్లీ సెల్ఫిష్ చిత్రం షూటింగ్‌ ను మొదలుపెట్టనున్నట్లు రీసెంట్ గా దిల్ రాజు తెలిపారు. విజయ్ దేవరకొండ హీరోగా రవికిరణ్ కోలా డైరెక్షన్ లో ఆయన రూపొందిస్తున్న మూవీ 2025 లాస్ట్ లో లేదా 2026లో రిలీజ్ అవ్వనున్నట్లు తెలుస్తోంది. వీటితోపాటు దిల్ రాజు డ్రీమ్స్ పేరుతో మరో బ్యానర్ ను ఇటీవల మొదలుపెట్టిన విషయం తెలిసిందే. మరి 2025లో దిల్ రాజు ఎన్ని చిత్రాలు రిలీజ్ చేస్తారో.. ఎలాంటి హిట్స్ అందుకుంటారో వేచి చూడాలి.