విమానాశ్రయ సిబ్బందిపై తెలుగు న‌టి ర‌చ్చ ర‌చ్చ!
అయితే ఇక్క‌డే ఒక చిక్కు వ‌చ్చి ప‌డింది. తన ప్ర‌యాణంలో అప‌శ్రుతి చోటు చేసుకుంది.;
మన్నారా చోప్రా ప‌రిచ‌యం అవ‌స‌రం లేదు. ప్రియాంక చోప్రాకు క‌జిన్ అయినా కానీ, కెరీర్ కోసం ఒంట‌రి పోరాటం సాగిస్తున్న ఈ బ్యూటీ ఇప్ప‌టికీ హైద‌రాబాద్ తో అనుబంధం కొన‌సాగిస్తోంది. టాలీవుడ్ అవ‌కాశం ఇచ్చింది గ‌నుక ఈ ప‌రిశ్ర‌మ‌పై మ‌న్నారాకు ప్రేమాభిమానాలు, గౌర‌వం ఉన్నాయి. కొన్నేళ్లుగా మన్నారా నిరంత‌రం ముంబై టు హైద‌రాబాద్, హైద‌రాబాద్ టు ముంబై ప్ర‌యాణిస్తుంది.
అయితే ఇక్క‌డే ఒక చిక్కు వ‌చ్చి ప‌డింది. తన ప్ర‌యాణంలో అప‌శ్రుతి చోటు చేసుకుంది. మన్నారా చోప్రా ఆదివారం ఉదయం ముంబై విమానాశ్రయంలో సమయానికి రెడీగా ఉన్నప్పటికీ జైపూర్‌కు వెళ్లే తన విమానం ఎక్కేందుకు అనుమతి నిరాకరించారని ఇండిగో ఎయిర్‌లైన్స్ సిబ్బందిపై ఫైర్ అయ్యారు. మన్నారా విమానాశ్రయ సిబ్బందితో వాదించి, తన పేరు ప్రకటించలేదని పేర్కొంది. కానీ నెటిజన్లు మన్నారా ఓవ‌రాక్ష‌న్ చేస్తోంద‌ని విమానాశ్రయంలో గొడవ సృష్టించింద‌ని విమర్శించడం కొస‌మెరుపు.
విమానం ముందు తాను ఉన్నప్పటికీ ఎయిర్‌లైన్స్ సిబ్బంది తనను విమానం ఎక్కనివ్వలేదని ఆమె తన ఇన్‌స్టాగ్రామ్‌లో షేర్ చేసిన వీడియోకు నెటిజ‌నులు వేగంగా స్పందించారు. తాను బోర్డింగ్ గేట్ ముందు కూర్చున్నానని, కానీ తన పేరును ప్రకటించ‌క‌పోవడంతో, తాను విమానం ఎక్కలేకపోయానని మన్నారా పేర్కొంది. తాను పరిష్కారం కోరినప్పుడు ఎయిర్‌లైన్స్ సిబ్బంది తనతో దురుసుగా ప్రవర్తించారని మన్నారా ఆరోపించింది. `ఈ ప్రవర్తన ఏమిటి?` అంటూ వీడియోలో అరుస్తూ క‌నిపించింది. అంతే కాదు.. విమానం షెడ్యూల్ సమయానికి 15 నిమిషాల ముందే బయలుదేరిందని మన్నారా పేర్కొంది. ఢిల్లీ విమానాశ్రయంలో అదే విమానయాన సంస్థతో ఇలాంటి సంఘ‌ట‌న‌ను ఎదుర్కొన్నాన‌ని తెలిపింది. అయితే మ‌న్నారాకు నెటిజ‌నుల నుంచి మ‌ద్ధ‌తు ల‌భించ‌లేదు. మ‌న్నారాతో పాటు వచ్చిన ఒక మహిళ ``మన్నారా పెద్ద సెలబ్రిటీ కాబట్టి.. ఆమె దేశానికి సేవ చేస్తోంది! కాబట్టి ఎయిర్‌లైన్స్ సిబ్బంది ఆమె పేరును ప్రకటించాల్సిందని పేర్కొనడంతో అది మ‌రింత ఫైరింగ్ కి ఆజ్యం పోసింది.
అయితే మన్నారా విషయంలో ఏం జ‌రిగినా కానీ, నెటిజ‌నులు త‌న‌కు మ‌ద్ధ‌తుగా లేరు. బహిరంగ ప్రదేశంలో గొడవ సృష్టించినందుకు నెటిజన్లు తీవ్రంగా విమర్శించారు. మ‌న్నారాపై నెటిజ‌నులు వెకిలిగా కామెంట్లు చేసారు. ``ఆమె దేశానికి సేవ చేయడం అంటే ఏమిటి? అని ఒక నెటిజ‌న్ పంచ్ వేశారు. కెరీర్ మ్యాట‌ర్ కి వ‌స్తే.... మన్నారా ప్రస్తుతం లాఫ్టర్ చెఫ్స్ సీజన్ 2 లో పోటీదారులలో ఒకరిగా కనిపిస్తోంది. `బిగ్ బాస్ 17`(హిందీ)లో తన ప్రదర్శన తర్వాత `డాన్స్ దీవానే 4` సీజన్ లో కూడా పాల్గొంది.