'గుంటూరు కారం'పై అసంతృప్తి లేదు..!

ఇచ్చట వాహనములు నిలుపరాదు సినిమాతో తెలుగు ప్రేక్షకులకు పరిచయం అయిన ముద్దుగుమ్మ మీనాక్షి చౌదరి ఈ ఏడాది ఆరంభంలో మహేష్ బాబు, త్రివిక్రమ్‌ కాంబోలో వచ్చిన గుంటూరు కారం సినిమాతో వచ్చింది. ఆ సినిమాలో హీరోయిన్‌గా శ్రీలీల నటించగా మీనాక్షి చౌదరి ఒక చిన్న పాత్రలో నటించింది. కథలో అసలు ప్రాముఖ్యత లేని పాత్ర ఇచ్చి మీనాక్షికి త్రివిక్రమ్‌ అన్యాయం చేశారు అంటూ కొందరు కామెంట్స్ చేశారు. ఇలాంటి ఆఫర్‌ ఇవ్వకున్నా బాగుండేది అంటూ కొందరు ఆ సమయంలో మీనాక్షి పట్ల సానుభూతి వ్యక్తం చేస్తూ ఆమెకు మద్దతుగా నిలవడం జరిగింది.

గుంటూరు కారం సినిమా ఆమెకి పెద్దగా పేరు తెచ్చింది లేదు. అయినా కెరీర్‌ పరంగా ఆమెకు వెనక్కి తిరిగి చూసుకోవాల్సిన అవసరం రాలేదు. ఇదే ఏడాదిలో ఆమె నటించిన సూపర్‌ స్టార్‌ విజయ్‌ తో నటించిన ది గోట్‌ సినిమా విడుదల అయింది. ఆ సినిమాకి మంచి మార్కులు పడ్డాయి. తాజాగా లక్కీ భాస్కర్‌ సినిమాతో ప్రేక్షకుల ముందుకు వచ్చేందుకు రెడీ అయింది. భారీ అంచనాల నడుమ రూపొందిన లక్కీ భాస్కర్‌ సినిమాలో దుల్కర్ సల్మాన్‌ కి జోడీగా మీనాక్షి చౌదరి నటించింది. సినిమా ప్రమోషన్‌లో భాగంగా ఇటీవల మీడియా ముందుకు వచ్చిన మీనాక్షి చౌదరి పలు విషయాల గురించి మాట్లాడింది.

మహేష్ బాబు గుంటూరు కారం సినిమాలో నటించే అవకాశం వచ్చినప్పటికీ, చాలా చిన్న పాత్ర అవ్వడంతో పాటు ప్రాధాన్యత లేకపోవడం నిరాశను కలిగించిందా అంటూ ప్రశ్నించిన సమయంలో ఆమె స్పందిస్తూ... గుంటూరు కారంలో నటించడం మంచి అనుభవంగా మిగిలింది. ఆ సినిమా పాత్ర విషయంలో నాకు ఎలాంటి అసంతృప్తి లేదని క్లారిటీ ఇచ్చింది. త్రివిక్రమ్‌ గారి దర్శకత్వంలో మహేష్ బాబు గారితో కలిసి నటించే అవకాశం రావడం గొప్ప విషయం అన్నట్లుగా మీనాక్షి చౌదరి అభిప్రాయం వ్యక్తం చేసింది. మొత్తానికి గుంటూరు కారం సినిమా విషయంలో ఎలాంటి బాధ, అసంతృప్తి లేదని మీనాక్షి క్లారిటీ ఇచ్చింది.

ప్రస్తుతం ఈ అమ్మడు పలు సినిమాల్లో నటిస్తోంది. ఈ ఏడాది ఇప్పటికే ఈమె నుంచి వరుసగా సినిమాలు వచ్చాయి, వస్తూనే ఉన్నాయి. ఈ వారంలో దుల్కర్ సల్మాన్‌ తో కలిసి నటించిన లక్కీ భాస్కర్ విడుదల కాబోతుండగా, త్వరలోనే ఈమె విశ్వక్‌ సేన్ తో కలిసి నటించిన మెకానిక్ రాకీ సినిమాతో రాబోతుంది. ఆ సినిమాపై కూడా అంచనాలు భారీగా ఉన్నాయి. ఇప్పటికే విడుదల అవ్వాల్సి ఉన్నా కొన్ని కారణాల వల్ల సినిమా ఆలస్యం అవుతూ వస్తోంది. ముందు ముందు ఈ అమ్మడు టాలీవుడ్‌ స్టార్‌ హీరోల సినిమాలతో ప్రేక్షకుల ముందుకు వచ్చే అవకాశాలు ఉన్నాయి. మహేష్‌ బాబుతో మరో సినిమాలో ఈమె నటించాలని, ఆ సినిమాలో మెయిన్ హీరోయిన్‌గా నటించాలని అంతా కోరుకుంటున్నారు. మరి అది సాధ్యం అయ్యేనా చూడాలి.