తమిళ దర్శకుడిని లైన్ లో పెట్టిన నాని?

నాచురల్ స్టార్ నానికి 'జెర్సీ' మూవీ ఎంత స్పెషలో తెలిసిందే. ఈ మూవీ నానికి మంచి పేరు తెచ్చి పెట్టింది. అంతేకాకుండా జెర్సీతో నటుడిగా నాని మరో మెట్టు పైకి ఎక్కాడు. విమర్శకుల ప్రశంసలు అందుకున్నాడు. అలాంటి ఈ స్పెషల్ మూవీని సితార ఎంటర్టైన్మెంట్స్ నిర్మించింది. జెర్సీ తర్వాత మళ్లీ ఈ బ్యానర్ లో నాని సినిమా చేసింది లేదు. తాజాగా సితార ఇప్పుడు అదే ప్రయత్నంలో ఉన్నట్లు తెలుస్తోంది.

గుంటూరు కారం తర్వాత త్రివిక్రమ్ నానితో ఓ సినిమా చేసే అవకాశం ఉన్నట్లు వార్తలు వినిపిస్తున్నాయి. ఒకవేళ ఈ కాంబినేషన్ వర్కౌట్ అయితే దీన్ని సితార బ్యానర్ అయినా నిర్మించాలి, లేకుంటే గురూజీ హోం బ్యానర్ హారిక హాసిని అయినా నిర్మించాలి. ఇది కాకుండా ఇప్పుడు మరో ప్రయత్నం కూడా జరుగుతోందట. కోలీవుడ్లో డిఫరెంట్ సినిమాలతో డైరెక్టర్ గా మంచి గుర్తింపు తెచ్చుకున్న కార్తీక్ సుబ్బరాజ్ నాని కోసం ఓ కథను తయారు చేశారని తెలుస్తోంది.

నానికి గనుక ఈ కథ నచ్చితే సితార బ్యానర్ లోనే ఈ సినిమా ఉంటుందట. ప్రస్తుతానికి నాని చేతిలో వివేక్ ఆత్రేయ 'సరిపోదా శనివారం' మూవీ ఒక్కటే ఉంది. ఈ మూవీ షూటింగ్ జరుపుకుంటోంది. ఈ మూవీ తర్వాత నిర్మాత చిట్టూరి శ్రీనివాస్ కు నాని ఓ సినిమా చేయాల్సి ఉంది. కాకపోతే డైరెక్టర్ శిబి చక్రవర్తి 100 కోట్లకు పైగా బడ్జెట్ కావాలని చెప్పడంతో ప్రస్తుతానికి అయితే ఆ ప్రాజెక్ట్ పక్కన పెట్టారు. సరైన డైరెక్టర్ దొరికితే నాని ఆ నిర్మాతతో సినిమా చేయాలి.

అలాగే దసరా డైరెక్టర్ శ్రీకాంత్ ఓదెలతో మరో సినిమా చేయాల్సి ఉంది. అయితే నాని మాత్రం నిర్మాతలను, దర్శకులను ఆచితూచి ఓకే చేస్తున్నాడు. అందుకే చేయబోయే ప్రాజెక్టుల విషయంలో ఏమాత్రం తొందరపడడం లేదు. ఇక రీసెంట్ గా జిగర్తాండ డబుల్ ఎక్స్ మూవీ తో దర్శకుడిగా తనదైన మేకింగ్ తో ఆకట్టుకున్నాడు కార్తీక్ సుబ్బరాజ్. సినిమా కమర్షియల్ గా సక్సెస్ కాకపోవచ్చు కానీ ఈ మూవీలో లారెన్స్, ఎస్. జె సూర్య యాక్టింగ్ తో పాటు సినిమాటోగ్రఫీ, కార్తీక్ సుబ్బరాజ్ స్టైల్ ఆఫ్ మేకింగ్ కి మంచి మార్కులు పడ్డాయి.

త్వరలోనే కార్తీక్ సుబ్బరాజ్ నానిని కలిసి కథ వినిపించబోతున్నట్లు తెలుస్తోంది. ప్రజెంట్ నాని 'హాయ్ నాన్న' సక్సెస్ టూర్ తో బిజీగా ఉన్నాడు. శౌర్యువ్ అనే డెబ్యూ డైరెక్టర్ తెరకెక్కించిన ఈ మూవీ ప్రస్తుతం బాక్సాఫీస్ వద్ద డీసెంట్ కలెక్షన్స్ అందుకుంటుంది. తండ్రి, కూతురు మధ్య సాగే బాండింగ్ నేపథ్యంలో ఎమోషనల్ డ్రామాగా తెరకెక్కిన ఈ సినిమాకి ఫ్యామిలీ ఆడియన్స్ నుంచి భారీ ఆదరణ దక్కుతోంది.