ఆ హీరోతో ఛాన్స్.. ఎగ్జ‌యిట్‌మెంట్ ఆపుకోలేని ర‌ష్మిక‌

2025 మోస్ట్ అవైటెడ్ చిత్రాలలో `సికందర్` ఒక‌టి. ఇందులో సూపర్ స్టార్ సల్మాన్ ఖాన్ స‌ర‌స‌న మొద‌టిసారి రష్మిక మందన్న నటిస్తోంది. ఇటీవల త‌న పాత్ర‌ చిత్రీకరణ ప్రారంభమైంద‌ని ర‌ష్మిక‌ సోషల్ మీడియాలో వెల్ల‌డించింది. సెట్ నుండి తెరవెనుక ఫోటోను షేర్ చేయ‌గా, అది అభిమానుల్లో ఉత్సాహాన్ని మరింత పెంచింది. సికందర్ షూటింగ్ మొదటి రోజు తెరవెనుక ఫోటో వైర‌ల్ గా మారింది. ఈ ఫోటోగ్రాఫ్‌లో రష్మికను స్వాగతించే స్వీట్ నోట్ స‌హా అందమైన పూల గుత్తి, సుందరమైన ఫ్లవర్ వాజ్ క‌నిపించాయి. డే-1 సికంద‌ర్ సెట్లో ఉన్నాను అంటూ మురిసిపోయింది ర‌ష్మిక‌. మొద‌టిసారి రష్మిక‌కు స‌ల్మాన్ లాంటి బ‌డా హీరో స‌ర‌స‌న న‌టించే అవ‌కాశం ల‌భించింది.

భాయ్ తో రొమాన్స్ చేసే అమ్మాయిగా న‌టించే అవ‌కాశం ద‌క్కడాన్ని త‌న అదృష్టంగా భావిస్తోంది ర‌ష్మిక‌. యూరప్‌లో కొన్ని కీలక సన్నివేశాలను చిత్రీక‌రించాల‌నేది ప్లాన్. అక్క‌డ సీన్స్ కోసం 10,000 పిస్టల్స్, మందుగుండు సామగ్రితో కూడిన భారీ యాక్షన్ సన్నివేశం తెర‌కెక్కించాల్సి ఉంటుంది. సల్మాన్ ఖాన్ ఈ చిత్రంలో ద్విపాత్రాభినయం చేస్తారని స‌మాచారం. స‌ల్మాన్ తో విలన్ కొడుకు ఢీకొట్టే ఒక తీవ్రమైన పోరాట సన్నివేశాన్ని ఒక ప్రైవేట్ జెట్‌లో చిత్రీకరిస్తార‌ని తెలిసింది. సల్మాన్ ఖాన్ - రష్మిక మందన్న -AR మురుగదాస్ బృందం `సికందర్` కోసం రెండు పాటలను చిత్రీకరించడానికి 2024 చివరిలో యూరప్‌కు వెళ్లనున్నారు. ప్రీతమ్ ఈ చిత్రం కోసం ప్రత్యేకంగా హై ఎనర్జీ ఉన్న స్వ‌రాల్ని స‌మ‌కూర్చార‌ని తెలిసింది. నిర్మాత సాజిద్ నడియద్వాలా ఈ పాటలను యూరోపియన్ లొకేషన్‌లలో భారీ స్థాయిలో చిత్రీకరించడానికి ప్లాన్ చేస్తున్నాడు. ప్రస్తుతం షెడ్యూళ్ల‌ను ఖరారు చేస్తున్నారు. నడియాద్వాలా గ్రాండ్‌సన్ బ్యానర్‌పై సాజిద్ నదియద్వాలా నిర్మిస్తున్న సికందర్ ఈద్ 2025న థియేటర్లలోకి రానుంది. ఈ చిత్రంలో ప్రతీక్ బబ్బర్, సునీల్ శెట్టి కూడా కీలక పాత్రల్లో నటిస్తున్నారు. బాహుబలి క‌ట్ట‌ప్ప, సీనియ‌ర్ న‌టుడు సత్యరాజ్ ప్రధాన ప్రతినాయకుడిగా నటించారు. కాజల్ అగర్వాల్ ఇందులో అతిథిగా క‌నిపించ‌నుంది.

కెరీర్ మ్యాట‌ర్ కి వ‌స్తే.. రష్మిక మందన్న ఇటీవల రణబీర్ కపూర్‌తో యానిమల్‌లో కనిపించింది. పుష్ప చిత్రంలోను శ్రీ‌వ‌ల్లిగా న‌టించి మెప్పించిన సంగ‌తి తెలిసిందే. ఈ రెండు సినిమాల సీక్వెళ్ల‌లోను క‌నిపించ‌నుంది. సికిందర్‌తో పాటు అల్లు అర్జున్‌తో పాటు పుష్ప 2: ది రూల్‌లో శ్రీవల్లి పాత్రలో మళ్లీ క‌నిపిస్తుంది. యానిమ‌ల్ 2లో త‌న పాత్ర‌కు కొన‌సాగింపును చిత్రీక‌రిస్తారు. `చావా` అనే హిస్టారిక‌ల్ డ్రామా మూవీలో కూడా నటించనుంది. ఇందులో విక్కీ కౌశల్‌తో స్క్రీన్‌ను షేర్ చేసుకోనుంది.