స్టార్ హీరో లేడీ మేనేజర్ డెత్ కేసు.. టెన్ష‌న్‌లో CM కుమారుడు!
ఈ కేసు చుట్టూ రాజ‌కీయ రంగు పులుముకోవ‌డం చ‌ర్చ‌నీయాంశ‌మైది.;
బాలీవుడ్ హీరో సుశాంత్ సింగ్ రాజ్ పుత్, అత‌డి మ‌నేజ‌ర్ దిశా సాలియన్ మ‌ర‌ణాల‌కు సంబంధించిన కేసులు కొత్త మలుపు తిర‌గ‌బోతున్నాయా? అంటే అవున‌నే తాజా స‌న్నివేశం చెబుతోంది. దివంగత దిశా సాలియన్ ఆక‌స్మిక మ‌ర‌ణం, ఆ తర్వాత ఆరు రోజుల‌కు సుశాంత్ సింగ్ ఆత్మ‌హ‌త్య అప్ప‌ట్లో సంచ‌ల‌నం సృష్టించాయి. ఈ మ‌ర‌ణాల వెన‌క మిస్ట‌రీ దాగి ఉందనే అనుమానాలు వ్య‌క్త‌మ‌య్యాయి. ఆ తర్వాత పోలీసుల‌తో పాటు, పలు ఏజెన్సీలు దర్యాప్తును ప్రారంభించాయి. కానీ దీనికి ముగింపు లేదు. ఈ కేసు చుట్టూ రాజ‌కీయ రంగు పులుముకోవ‌డం చ‌ర్చ‌నీయాంశ‌మైది.
ఇప్పుడు దిశా సాలియన్ తండ్రి సతీష్ సాలియన్ దాఖలు చేసిన పిటిషన్‌ను ముంబై హైకోర్టు ఏప్రిల్ 2న విచారించనుంది. దిశా మరణానికి సంబంధించి మహారాష్ట్ర మాజీ ముఖ్య‌మంత్రి ఉద్ధ‌వ్ ఠాక్రే కుమారుడు, శివసేన (యుబిటి) నాయకుడు ఆదిత్య థాకరే స‌హా ఇతరులపై ఎఫ్.ఐ.ఆర్ నమోదు చేయాలని పిటిషన్ లో పేర్కొన్నారు. తన పిటిషన్‌లో సతీష్ సాలియన్ 8 జూన్ 2020న తన కుమార్తె దిశా సాలియన్ తన నివాసంలో ఒక పార్టీని నిర్వహించిందని, దానికి ఆదిత్య థాకరే, నటులు సూరజ్ పంచోలి, డినో మోరియా హాజరయ్యారు అని ఆరోపించారు. దిశా మరణానికి సంబంధించిన పరిస్థితులకు సంబంధించి సమాధానం లేని ప్రశ్నలు ఉన్నాయని ఎఫ్.ఐ.ఆర్ నమోదు చేసి సమగ్ర దర్యాప్తు నిర్వహించాలని అధికారులను ఆదేశించాలని కోర్టును అభ్యర్థించారు. పిటిషన్ కాపీని సతీష్ సాలియన్ తరపున వాదించే న్యాయవాది ద్వారా మాజీ నార్కోటిక్స్ కంట్రోల్ బ్యూరో (ఎన్సీబీ) అధికారి సమీర్ వాంఖడేకు కూడా అందజేసారు.
వాంఖడే న్యాయవాది అడ్వకేట్ ఫైజ్ మర్చంట్ మాట్లాడుతూ... తన క్లయింట్ హైకోర్టులో వివరణాత్మక అఫిడవిట్‌ను సమర్పిస్తారని, పిటిషన్‌లో లేవనెత్తిన అన్ని అంశాలను పరిష్కరిస్తారని ఈ కేసులో తన పాత్రకు సంబంధించి వివరణలు ఇస్తారని చెప్పారు. చట్టపరమైన చర్యలలో భాగంగా వాంఖడే తన అధికారిక దర్యాప్తు సమయంలో సేకరించిన కీలక ఆధారాలను, ముఖ్యంగా రియా చక్రవర్తి - ఆదిత్య ఠాక్రేకు సంబంధించిన ఆధారాలను సమర్పించాలని భావిస్తున్నారు. పిటిషన్ దాఖలు చేయడానికి ముందు తయారు చేసిన వాంఖడే అఫిడవిట్ మీడియాలో ప్రచారం అయింద‌ని, ప‌లువురు ఉన్నత స్థాయి వ్యక్తులను ఇరికించగల తీవ్రమైన ఆరోపణలు అఫిడవిట్ లో పొందుప‌రిచార‌ని సంబంధిత వర్గాలు చెబుతున్నాయి. దిశ మరణానికి దారితీసిన సంఘటనల సీక్వెన్సుల‌పై దృష్టి సారించి సతీష్ సాలియన్ విజ్ఞప్తిని దృష్టిలో ఉంచుకుని కోర్టు కేసును సమీక్షించాలని భావిస్తున్నారు.
ఈ కేసులో ఒక ముఖ్యమైన మలుపు.. దివంగత బాలీవుడ్ నటుడు సుశాంత్ సింగ్ రాజ్‌పుత్ మాజీ మేనేజర్ దిశా సాలియన్ 8 జూన్ 2020న ముంబైలోని ఒక ఎత్తైన భవనంలోని 14వ అంతస్తు నుండి పడి మరణించారని ఆరోపణ.
ఆ సమయంలో ముంబై పోలీసులు యాక్సిడెంటల్ డెత్ రిపోర్ట్ (ఏడిఆర్‌) నమోదు చేశారు. ఆరు రోజుల తర్వాత సుశాంత్ సింగ్ రాజ్‌పుత్ తన బాంద్రా నివాసంలో మృతి చెంది కనిపించారు. కేంద్ర దర్యాప్తు సంస్థ (సీబీఐ) సుశాంత్ సింగ్ మరణంపై దర్యాప్తును చేపట్టగా, దిశ మరణంపై దర్యాప్తు చేయడానికి 2023లో మహారాష్ట్ర ప్రభుత్వం SIT (స్పెషల్ ఇన్వెస్టిగేషన్ టీమ్)ను ఏర్పాటు చేసింది. దిశా సాలియన్ మరణంపై సీబీఐ దర్యాప్తు చేయాలని శివసేన డిమాండ్ చేసింది. దిశా కుటుంబంపై అనవసరమైన ఒత్తిడి ఉందా? అని ప్రశ్నిస్తూ ముంబై మాజీ మేయర్ కిషోరి పెడ్నేకర్ పాత్రపై దర్యాప్తు చేయాలని పార్టీ శాసనసభ్యులు డిమాండ్ చేశారు. ప్ర‌స్తుతం ఈ కేసు పూర్తిగా రాజ‌కీయ రంగు పులుముకుంది. అయితే దిశా సాలియన్ కేసుకు సంబంధించిన త‌న‌పై వ‌చ్చిన అన్ని ఆరోపణలు, వాదనలను ఆదిత్య థాకరే నిర్ద్వంద్వంగా తోసిపుచ్చారు.