భయపెట్టడానికి రెడీ అవుతున్న అనన్య నాగళ్ల..!

అనన్య నాగళ్ల మన తెలుగు అందం. హీరోయిన్ గా మంచి గుర్తింపు తెచ్చుకోవడానికి ప్రయత్నిస్తోంది. చూడటానికి అందంగా ఉంటుంది, ఎక్స్ పోజింగ్ చేయడంలోనూ పెద్దగా వెనకాడదు. అయినా అనన్యకు అనుకున్నంత గుర్తింపు రాలేదనే చెప్పాలి. ఇప్పటి వరకు ఆమె మల్లేశం, వకీల్ సాబ్ వంటి సినిమాలో నటించింది. వకీల్ సాబ్ తో ఆమెకు కాస్త గుర్తింపు దక్కింది. ఆ తర్వాత మళ్లీ పెళ్లి అనే సినిమాలో ఓ చిన్న పాత్రలో మెరిసింది. మధ్యలో కొన్ని సినిమాలు చేసింది కానీ, పెద్దగా క్లిక్ అవ్వలేదు.

అయితే, ఈసారి ప్రేక్షకులను భయపెట్టాలని డిసైడ్ అయ్యింది. ఆమె ప్రధాన పాత్రలో నటిస్తున్న తాజా చిత్రం తంత్ర. హర్రర్ థ్రిల్లర్ గా ఈ మూవీ తెరకెక్కుతోంది. ఈ మూవీలో సీనియర్ హీరో దివంగత శ్రీహరి తమ్ముడి కుమారుడు ధనుష్ హీరోగా పరిచయం అవుతుండటం విశేషం. వీరితో పాటు, మర్యాద రామన్న ఫేమ్ హీరోయిన్ సలోనీ ఈ మూవీలో ప్రధాన పాత్ర పోషిస్తున్నారు

కాగా, తాజాగా ఈ మూవీ పోస్టర్ విడుదల చేశారు. పోస్టర్ చూస్తూనే, ఇదేదో హర్రర్ మూవీ అనే విషయం అర్థమౌతోంది. అనన్య ముఖాన్ని ఎవరో చేతులతో పట్టుకున్నట్లుగా ఉంది ఆ పోస్టర్. చూడగానే భయం కలుగుతోంది? ఇంతకీ ఆ చేతులు ఎవరివి? ఈ మూవీ టీమ్ ఎలా భయపెట్టనుందో తెలియాలంటే, విడుదలయ్యే వరకు ఆగాల్సిందే.

తంత్ర శాస్త్రానికి చెందిన విస్తు గొలిపే రహస్యాలను ఈ మూవీ ద్వారా ప్రేక్షకులకు తెలియజేయనున్నారట. ఫస్ట్‌ కాపీ మూవీస్‌, బి ద వే ఫిల్మ్స్‌, వి ఫిల్మ్‌ ఫ్యాక్టరీ సంస్థలు సంయుక్తంగా ఈ మూవీని నిర్మిస్తున్నారు. ఇక ఈ సినిమా తో శ్రీనివాస్ గోపిశెట్టి దర్శకుడిగా పరిచయం అవుతున్నాడు. ఇది కంప్లీట్ గా ఉమెన్ సెంట్రిక్ మూవీ అని తెలుస్తోంది.

మరి, ఈ మూవీ అనన్య కెరీర్ కి ఎంత వరకు ఉపయోగపడుతుందో తెలియాలంటే, కొంతకాలం ఎదురు చూడాల్సిందే. ఇక, ఈ మూవీ షూటింగ్ శరవేగంగా జరుగుతోంది. త్వరలోనే మూవీ టీమ్ టీజర్, ట్రైలర్ లతో ప్రేక్షకుల ముందుకు రానుంది.