ఏడు ఏళ్ల తర్వాత హ్యాట్రిక్ కాంబో..!

కోలీవుడ్‌ సూపర్‌ స్టార్‌ విజయ్ రాజకీయాల్లో అడుగు పెట్టాడు. వచ్చే తమిళనాడు అసెంబ్లీ ఎన్నికల్లో పోటీ చేసి విజయం సాధించేందుకు ఇప్పటి నుంచే గ్రౌండ్‌ ప్రిపేర్‌ చేసుకుంటున్న విషయం తెల్సిందే. ఈ నేపథ్యంలో విజయ్ సినిమా ఇండస్ట్రీకి దూరం కాబోతున్నాడు. ప్రస్తుతం హెచ్‌ వినోద్‌ దర్శకత్వంలో చేస్తున్న సినిమా తర్వాత విజయ్ సినిమాలు చేయక పోవచ్చు అనే టాక్‌ వినిపిస్తుంది. విజయ్ సినిమా కావడంతో అంచనాలు భారీగా ఉన్నాయి. అంచనాలకు ఏమాత్రం తగ్గకుండా దర్శకుడు వినోద్‌ సినిమాను రూపొందిస్తున్నాడు. ఈ సినిమాలో పూజా హెగ్డేను హీరోయిన్‌గా ఎంపిక చేయడం జరిగింది. తాజాగా ముఖ్య పాత్ర కోసం సమంతను సంప్రదించారని వార్తలు వస్తున్నాయి.

విజయ్ తో గతంలో సమంత కత్తి, తేరి, మెర్సల్‌ సినిమాల్లో నటించింది. ఆ మూడు సినిమాలు సైతం భారీ విజయాన్ని సొంతం చేసుకుని హ్యాట్రిక్‌ కాంబోగా నిలిచింది. సమంత, విజయ్‌ హ్యాట్రిక్‌ కాంబో మూవీ వచ్చి ఏడు సంవత్సరాలు అవుతోంది. వీరి కాంబోలో ఆ తర్వాత ఒకటి రెండు సార్లు సినిమాలు తీసుకు వచ్చేందుకు చర్చలు జరిగాయి. కానీ కొన్ని కారణాల వల్ల వీరి కాంబో వర్కౌట్‌ కాలేదు. విజయ్ సినిమాలకు గుడ్‌ బై చెప్పబోతున్న నేపథ్యంలో వీరి కాంబో మూవీ ఇక చూడటం అసాధ్యం అని అంతా భావిస్తున్నారు. ఈ సమయంలో విజయ్‌ 69వ సినిమాలో సమంతను నటింపజేసే ప్రయత్నాలు జరుగుతున్నాయని వార్తలు రావడంతో ఫ్యాన్స్ ఆనందం వ్యక్తం చేస్తున్నారు.

ఏడు సంవత్సరాల తర్వాత విజయ్‌, సమంత జోడీని వెండి తెరపై చూస్తామా అని అంతా ఆసక్తిగా ఎదురు చూస్తున్నారు. ఇటీవల సిటాడెల్‌ వెబ్‌ సిరీస్‌తో ప్రేక్షకుల ముందుకు వచ్చిన సమంత ఒక ఇంటర్వ్యూలో మాట్లాడుతూ పాత్రకు ప్రాధాన్యత ఉన్న సినిమాలు చేసేందుకు రెడీ అంది. అంతే కాకుండా ప్రాముఖ్యత లేని సినిమాలను పెద్ద హీరోల సినిమాలను చేయాలని అనుకోవడం లేదని కూడా సమంత చెప్పింది. దాంతో విజయ్ తో ఈ సినిమాలో ఆమె నటించే అవకాశాలు ఉన్నాయా లేదా అనే అనుమానాలు వ్యక్తం అవుతున్నాయి.

ఇప్పటి వరకు ఈ విషయమై అధికారికంగా క్లారిటీ రాలేదు.. కానీ సోషల్‌ మీడియాలో మాత్రం ఈ విషయమై పెద్ద ఎత్తున చర్చ జరుగుతోంది. విజయ్‌, సమంత జంటగా గతంలో వచ్చిన సినిమాలన్నీ భారీ విజయాలను సొంతం చేసుకున్న నేపథ్యంలో విజయ్ చివరి సినిమాలోనూ ఆమె నటిస్తే సెంటిమెంట్‌ వర్కౌట్‌ అయ్యి భారీ విజయాన్ని సొంతం చేసుకునే అవకాశాలు ఉన్నాయని ఫ్యాన్స్‌ అభిప్రాయం వ్యక్తం చేస్తున్నారు. సిటాడెల్‌ వెబ్‌ సిరీస్‌ స్ట్రీమింగ్ తర్వాత సమంత తదుపరి ప్రాజెక్ట్ ఏంటా అని అంతా ఆసక్తిగా ఎదురు చూస్తున్నారు. సినిమాలతో పాటు సిరీస్‌లోనూ సమంత నటిస్తోంది. ఏడాది బ్రేక్ తర్వాత సమంత చాలా బిజీ బిజీగా సినిమాలు చేస్తోంది.