ఒసామా బిన్ లాడెన్ నా నంబ‌ర్ వ‌న్ ఫ్యాన్: ప్ర‌ముఖ గాయని
అల్కా యాగ్నిక్ బాలీవుడ్‌లోని అత్యంత ప్రసిద్ధ నేపథ్య గాయనీమ‌ణుల్లో ఒకరు. చాలా చిన్న వయస్సులోనే గాయ‌నిగా మొద‌లై సంచ‌ల‌నాలెన్నో సృష్టించారు.;
అమెరికా వెన్ను విరిచి ప్ర‌పంచాన్ని గ‌డ‌గ‌డ‌లాడించిన ఒసామా బిన్ లాడెన్‌కి ప్రపంచవ్యాప్తంగా భారీ ఫాలోయింగ్ ఉంది. అగ్ర రాజ్య అహంకారానికి తూట్లు పొడిచిన ఏకైక మాన్ స్టార్ కాబ‌ట్టి, లాడెన్‌కి ప్రపంచవ్యాప్తంగా ఫ్యాన్స్ ఉన్నారు. అయితే ఆయ‌న ఎవ‌రికి వీరాభిమాని? అంటే... సంగీత ప్రియుడు అయిన లాడెన్ గాయని అల్కా య‌గ్నిక్ కి వీరాభిమాని. లాడెన్ నా నంబ‌ర్ వ‌న్ అభిమాని అని అల్కా స్వ‌యంగా ప్ర‌క‌టించ‌డం ఇప్పుడు హాట్ టాపిగ్గా మారింది.
అల్కా యాగ్నిక్ బాలీవుడ్‌లోని అత్యంత ప్రసిద్ధ నేపథ్య గాయనీమ‌ణుల్లో ఒకరు. చాలా చిన్న వయస్సులోనే గాయ‌నిగా మొద‌లై సంచ‌ల‌నాలెన్నో సృష్టించారు. 1980లలో చిత్ర పరిశ్రమలోకి అడుగుపెట్టిన అల్కా 1988లో విడుదలైన `తేజాబ్` చిత్రం నుండి `ఏక్ దో తీన్` పాటతో విజ‌య శిఖ‌రాల‌ను అధిరోహించారు. బాజీగర్, హమ్ హై రహి ప్యార్ కే, కుచ్ కుచ్ హోతా హై, కభీ ఖుషీ కభీ ఘమ్, తమాషా వంటి చిత్రాలకు చార్ట్ బ‌స్ట‌ర్ పాటలను అల్కా య‌గ్నిక్ పాడారు. 1990లు, 2000 ప్రారంభంలో అల్కా స్వరం బాలీవుడ్ సంగీతంలో డెఫినిష‌న్‌గా మారింది. అల్కా స్వ‌రానికి ప్రపంచవ్యాప్తంగా భారీ అభిమానులు ఉన్నారు. ఒసామా బిన్ లాడెన్ ఆమెకు అతిపెద్ద అభిమానిని అని ప్ర‌క‌టించారు.
మే 2011లో అబోటాబాద్‌లోని బిన్ లాడెన్ దాక్కున్న ప్రదేశంపై సిఐఏ దాడి చేసినప్పుడు వారు అతడి కంప్యూటర్‌లో అనేక బాలీవుడ్ హిట్ పాటలను కనుగొన్నారు. వీటిలో ఉదిత్ నారాయణ్, కుమార్ సాను, అల్కా యాగ్నిక్ పాడిన పాటలు ఉన్నాయి. లాడెన్ అభిమాన గాయని లిస్ట్ లో అల్కా ఉంద‌ని చెప్పినప్పుడు త‌ను ఆశ్చర్యపోయింది. ఆ త‌ర్వాత ఒక ఇంటర్వ్యూలో మాట్లాడుతూ అతడు తన `నెంబర్ 1 అభిమాని` అని అన్నారు. అది నా త‌ప్పా? అని కూడా అల్కా ప్ర‌శ్నించారు. ఒసామా బిన్ లాడెన్ ఎవరు అయినా సరే అతడి క‌ళాభిమానాన్ని చూడాలి. అతడు నా పాటలను ఇష్టపడితే మంచిదే క‌దా! అని అన్నారు.
నీచ రాజ‌కీయాల‌తో అవ‌కాశాలు పోగొట్టుకున్నా:
ఇదే ఇంటర్వ్యూలో ఇండస్ట్రీ రాజకీయాల కారణంగా చాలా పాటలను పాడే అవ‌కాశం కోల్పోయాన‌ని కూడా అల్కా తెలిపారు. ప్రతి పనిలో రాజకీయాలున్నాయి.. నాకు చాలా అవ‌కాశాలు పోయాయి. నా సమకాలీనులలో ఒకరు నాతో చాలా నీచమైన రాజకీయాలకు పాల్ప‌డ్డారు. నేను రిహార్స‌ల్ చేసిన పాట‌ను ఒక సీనియర్ గాయకురాలు పాడార‌ని తెలిసి షాక‌య్యాను. ఇలాంటివి ఎన్నో ఉన్నాయి అని గుర్తు చేసుకున్నారు. నేను స్వీయ విశ్లేషణాత్మక, స్వీయ విమర్శనాశీలిని... ఈరోజు నా పాట రేడియోలో ప్లే అవుతున్నా దానిలో ఏదో తప్పు అనిపించినా స్టేషన్ మార్చమని నేను డ్రైవర్‌ను అడుగుతాను. నేను ప్రతి పాట‌ను నా హృదయంతో పాడాను అని తెలిపారు.