APలో కొత్త ప‌రిశ్ర‌మ కావాలి.. నంది అవార్డుల్ని పున‌రుద్ధ‌రించాలి!

ఆంధ్రప్రదేశ్‌లో తెలుగు సినిమా పరిశ్రమ అభివృద్ధి కోసం కొత్త పాల‌సీని తీసుకురావాలని నిర్ణయించినందుకు గౌరవనీయులైన ఆంధ్రప్రదేశ్ ముఖ్యమంత్రి నారా చంద్రబాబు నాయుడుకి ఏపీ ఫిలింఛాంబ‌ర్ ప్ర‌త్యేక కృత‌జ్ఞ‌త‌లు తెలియ‌జేసింది., ఉప ముఖ్యమంత్రి పవన్ కళ్యాణ్ , మానవ వనరుల అభివృద్ధి, ఐటీ & ఎలక్ట్రానిక్స్ కమ్యూనికేషన్స్‌ మంత్రి నారా లోకేష్ , పర్యాటక, సంస్కృతి , సినిమాటోగ్రఫీ మంత్రి శ్రీ కందుల దుర్గేష్, ఆంధ్రప్రదేశ్ చలనచిత్ర అభివృద్ధి సంస్థ (APFDC) లకు తెలుగు చలనచిత్ర నిర్మాతల మండలి హృదయపూర్వక కృతజ్ఞతలు తెలియజేసింది.

ఒక కొత్త ప‌రిశ్ర‌మ అభివృద్ధి విషయంలో తెలుగు చలనచిత్ర నిర్మాతల మండలి, తెలుగు చలనచిత్ర వాణిజ్య మండలి, తెలుగు చలనచిత్ర పరిశ్రమ ప్రతినిధులు , ప్రముఖ నిర్మాతలు ఇప్పటికే గౌరవనీయ ముఖ్యమంత్రి నారా చంద్రబాబు నాయుడు , గౌరవనీయ ఉప ముఖ్యమంత్రి పవన్ కళ్యాణ్ , గౌరవనీయ సినిమాటోగ్రఫీ మంత్రి కందుల దుర్గేష్ ల‌ను కలిసి, ఆంధ్రప్రదేశ్లో తెలుగు చలనచిత్ర పరిశ్రమ అభివృద్ధికి సంబంధించిన ప్రతిపాదనలను ముందుకు తెస్తూ వైజాగ్, తిరుపతి, రాజమహేంద్రవరంలో స్టూడియోల నిర్మాణం/ మౌలిక సదుపాయాల ఏర్పాటు , నిర్మాతలు, కళాకారులు, దర్శకులు, సాంకేతిక నిపుణులకు గృహనిర్మాణం కోసం భూమి కేటాయింపు వంటి ప్రతిపాదనలను సమర్పించామని, ఆంధ్రప్రదేశ్లో తెలుగు చలనచిత్ర పరిశ్రమ వేగవంతమైన అభివృద్ధి కోసం ఆంధ్రప్రదేశ్ ప్రభుత్వానికి మా పూర్తి సహకారం, మద్దతును అందిస్తున్నామ‌ని ఫిలింఛాంబ‌ర్ ప్ర‌క‌టించింది. ఇంకా, నంది అవార్డులను పునరుద్ధరించాలని, పెండింగ్‌లో ఉన్న అవార్డులనుకూడా ఇవ్వాలని అభ్యర్థించామని ఛాంబ‌ర్ ప్రతినిధులు ఒక ప్ర‌క‌ట‌న‌లో తెలిపారు.

ఆంధ్రప్రదేశ్ ప్రభుత్వం పై విష‌యాల‌లో త్వరిత చర్య తీసుకోవాలని వినయపూర్వ‌క‌ అభ్యర్ధనతో మేము ఎదురుచూస్తున్నామని, దీని ద్వారా తెలుగు చలనచిత్ర పరిశ్రమ ఆంధ్రప్రదేశ్ లో చలనచిత్ర నిర్మాణానికి అవసరమైన మౌలిక సదుపాయాలను ఏర్పాటు చేయడానికి ముందుకు సాగుతుంద‌ని తెలియజేస్తూ.. నిర్మాత‌ల మండ‌లి గౌర‌వ కార్య‌ద‌ర్శి టి. ప్రసన్న కుమార్ ఒక ప్ర‌క‌ట‌న‌ను విడుద‌ల చేసారు. తెలంగాణ‌లో గ‌ద్ద‌ర్ ఫిలిం అవార్డులను ప్ర‌క‌టించినందుకు ముఖ్య‌మంత్రి రేవంత్ రెడ్డికి తెలుగు చల‌న‌చిత్ర ప‌రిశ్ర‌మ కృత‌జ్ఞ‌త‌లు తెలిపిన సంగ‌తి తెలిసిందే.