'అఖండ' ఫైనల్ షెడ్యూల్ కోసం బరిలో దిగిన బాలయ్య..!

నటసింహ నందమూరి బాలకృష్ణ - దర్శకుడు బోయపాటి శ్రీను కాంబినేషన్ లో రూపొందుతున్న హ్యాట్రిక్ మూవీ ''అఖండ''. వీరి కలయికలో వచ్చిన 'సింహా' 'లెజెండ్' సినిమాలు బ్లాక్ బస్టర్ హిట్స్ అవడంతో ఈ యాక్షన్ ఎంటర్టైనర్ పై భారీ అంచనాలు నెలకొన్నాయి. ఇందులో ద్విపాత్రాభినయం చేస్తున్న బాలయ్య.. ఫ్యాక్షనిస్ట్ - అఘోరా పాత్రల్లో కనిపించనున్నారు. ఇప్పటికే విడుదలైన ప్రచార చిత్రాలు - టీజర్స్ విశేష స్పందన తెచ్చుకున్నాయి. ముఖ్యంగా టైటిల్‌ రోర్ తో వచ్చిన సెకండ్ టీజర్ రికార్డు వ్యూస్ తెచ్చుకుంది. యూట్యూబ్ లో వేగంగా 50 మిలియన్ వ్యూస్ అందుకున్న ఫస్ట్ తెలుగు సినిమాగా రికార్డ్ క్రియేట్ చేసింది.

'అఖండ' సినిమా చివరి దశకు వచ్చేసింది. కరోనా సెకండ్ వేవ్ కారణంగా నిలిచిపోయిన షూటింగ్ తిరిగి ప్రారంభమైంది. ఈరోజు హైదరాబాద్ లో ఫైనల్ షెడ్యూల్ షూటింగ్ స్టార్ట్ అయిందని.. దీంతో సినిమా మొత్తం పూర్తవుతుందని మేకర్స్ వెల్లడించారు. ఈ సందర్భంగా ఓ వర్కింగ్ స్టిల్ ని రిలీజ్ చేశారు. ఇందులో అఘోరా గెటప్ లో ఉన్న బాలకృష్ణ తో బోయపాటి శ్రీను సీన్ గురించి వివరిస్తూ కనిపిస్తున్నారు. కాగా, ఈ చిత్రంతో ప్రగ్యా జైస్వాల్‌ హీరోయిన్ గా నటిస్తోంది. శ్రీకాంత్ - జగపతిబాబు - పూర్ణ కీలక పాత్రలు పోషిస్తున్నారు.

'అఖండ' చిత్రానికి ఎస్.ఎస్. థమన్‌ సంగీతం సమకూరుస్తున్నారు. రామ్ ప్రసాద్ సినిమాటోగ్రఫీ అందిస్తుండగా.. కోటగిరి వెంకటేశ్వరరావు ఎడిటింగ్ వర్క్ చేస్తున్నారు. మిర్యాల సత్యనారాయణ రెడ్డి సమర్పణలో ద్వారకా క్రియేషన్స్‌ బ్యానర్‌ పై ఈ సినిమా రూపొందుతోంది. మిర్యాల రవీందర్ రెడ్డి భారీ బడ్జెట్ తో ఈ చిత్రాన్ని నిర్మిస్తున్నారు.