మలయాళ సినిమాకు ఇలాంటి ఓపెనింగ్సా.. ఇదేమి ఊచకోత సామీ!

ఇండియన్ సినిమా హిస్టరీలో ఇప్పుడు ఒక మలయాళ సినిమా అంచనాలకు మించి చర్చల్లో నిలుస్తోంది. స్టార్ హీరోలతో కాదు, మాస్ మసాలా లేకపోయినా, కంటెంట్ కంటెంట్ గానే ఉంటే ప్రేక్షకులు ఎలా స్పందిస్తారో తాజాగా ‘ఎల్2: ఎంపురాన్’ నిరూపిస్తోంది. లూసిఫర్ సినిమాకు సీక్వెల్‌గా పృథ్వీరాజ్ సుకుమారన్ దర్శకత్వంలో తెరకెక్కిన ఈ చిత్రం ఇప్పటికే టీజర్, ట్రైలర్‌తో మంచి బజ్ సెట్ చేసుకుంది. కానీ ఈ బజ్‌ని క్యాష్ చేయడం చాలా సినిమాలకు కష్టమే. కానీ ఎల్2 మాత్రం దాన్ని వాడేసుకుంది.

మోహన్‌లాల్ నటనకి ఉన్న క్రేజ్, పొలిటికల్ బ్యాక్‌డ్రాప్‌తో కూడిన స్క్రీన్‌ప్లేకి ప్రేక్షకుల్లోనూ ట్రేడ్‌లోనూ మంచి హైప్ ఉంది. ఇక ఆ ఆసక్తి వలన, విడుదలకు ముందే భారీ స్థాయిలో కనిపిస్తోంది. అంతేకాదు, ఇప్పుడిదే సినిమాకు చరిత్ర సృష్టించే స్థాయిలో ఓపెనింగ్స్‌ను తీసుకురావడంలో కీలకంగా మారింది. భారీ బడ్జెట్‌తో, దేశవ్యాప్తంగా మల్టీ లాంగ్వేజ్ రిలీజ్ చేస్తుండటంతో, ‘ఎల్2: ఎంపురాన్’కు అన్ని కేంద్రాల్లోనూ భారీ అడ్వాన్స్ బుకింగ్స్ నడుస్తున్నాయి.

లేటెస్ట్ టాక్ ప్రకారం, ఈ సినిమా ప్రపంచవ్యాప్తంగా ప్రీ సేల్ వసూళ్లు రూ.20 కోట్ల మార్క్‌ను దాటేశాయట. మలయాళ సినిమా హిస్టరీలో ఇదే హయ్యెస్ట్ అని తెలుస్తోంది. ఇప్పటివరకు ఎవరూ అందుకోలేని స్థాయిలో మోహన్‌లాల్ ఈ చిత్రం ద్వారా మార్కెట్‌ను విస్తరించాడు. బుక్ మై షోలో 24 గంటల్లో 6.28 లక్షల టికెట్లు అమ్ముడవడం కూడా ఓ రికార్డే. ఇప్పటివరకు అల్లు అర్జున్ 'పుష్ప 2', ప్రభాస్ 'కల్కి 2898AD' వంటి బిగ్ బడ్జెట్ చిత్రాలకు మాత్రమే వచ్చిన రేంజ్ ఇది.

ఈ హైప్ వల్ల ఫస్ట్ డే వసూళ్లు కచ్చితంగా కొత్త రికార్డులను క్రియేట్ చేయబోతున్నాయన్న అంచనాలు ఉన్నాయి. మలయాళం మాత్రమే కాదు, ఇతర భాషల్లోనూ బుకింగ్స్ స్టెడీగా పెరుగుతున్నాయి. తమిళ్, తెలుగు, కన్నడ రాష్ట్రాల్లో మల్టీప్లెక్స్‌లలో ఈ సినిమాకు స్పెషల్ స్క్రీన్లు కేటాయించబడుతున్నాయి. పృథ్వీరాజ్ సుకుమారన్ దర్శకత్వంతో పాటు ఆయన నటన కూడా ఈ సినిమాకి మిలియన్ల ప్రేక్షకులను మళ్లించబోతున్నట్లు తెలుస్తోంది.

మార్చి 27న రిలీజ్ కానున్న ఈ సినిమా మొదటి వారం పూర్తయ్యేలోపు ఈజీగా 100 కోట్ల మార్క్‌ను క్రాస్ చేయగలదా అన్నదే ఆసక్తికరంగా మారింది. ముఖ్యంగా ఒక మలయాళ సినిమాకి దేశవ్యాప్తంగా ఈ స్థాయిలో ప్రేక్షకుల స్పందన రావడం అరుదైన పరిణామం. ఇది కేవలం మోహన్‌లాల్ స్టామినాకు కాదు, కంటెంట్‌కు ప్రేక్షకుల విశ్వాసానికి నిలువెత్తు నిదర్శనం. ఇక రిలీజ్ తర్వాత వసూళ్ల వర్షం ఎప్పటి వరకు సాగుతుందో చూడాలి.